Bler temp da sia uffanza ha la dunna da 48 onns passentà a Mustér tar sia tatta e ses tat Fry-Manetsch. In temp che ha laschà enavos bleras bellas regurdientschas ed oravant tut l'amur per la cultura rumantscha.
Sco buoba pitschna hai jau adina ditg, jau sun ina da là si.
Scola e sport èn stads da pitschen ensi duas impurtantas cumponentas en la vita da la dunna ch'è creschida si a Cuira. Uschia ha ella fatg suenter il seminari da magisters dus studis, quel da pedagogia e quel da sport. Sco nudadra ha ella prendì part a concurrenzas naziunalas ed internaziunalas.
Cun 20 onns hai jau survegnì l'offerta da restar a Hawai e da ma concentrar uschia pli fitg sin il sport da nudar.
Il sport ha stuì far plaz als studis. Ed uschia è la nova manadra da l'Uffizi chantunal per la scola populara ed il sport s'occupada gia en sia lavur da dissertaziun cun il tema «Scola populara dal Grischun sut l'ensaina da midadas. Actus – furmaziun da persunas d'instrucziun – surveglianza da scola». Ella lavuria gugent e bler ed haja adina lavurà sc'in um, di la mamma d'ina buoba da 10 onns che va en ses temp liber gugent sin viadi.