Dapi ch'il cornavirus occupa tut il mund è ella – sco entusiasta da la China - dumandada pli che mai sco intermediatura tranter las culturas . La Sursilvana ha studegià e vivì en China ed enconuscha bain la cultura chinaisa. Dapi 2 onns lavura ella sco assistenta e collavuratura scientifica a la Scola auta spezialisada dal chantun Grischun – nua ch'ella tgira tut ils projects en connex cun la China .
La crisa actuala haja era sias bunas varts , di la dunna da 29 onns che s'interessescha era per la politica internaziunala. La solidaritad sin tut il mund saja pli gronda – uss stoppian era ils Stadis Unids e la China collavurar per far frunt a questa crisa.
Ella persunalmain giaudia quest temp pli ruassaivel ed il fatg da dastgar e savair far nagut. Ella saja uschiglio adina be sin il «trot» tranter Cuira, Turitg, Londra e Shanghai. Uss dettia ella blers gieus e realiseschia projects en ses perchasa.