Eric Beer è adina suandà ses cor. L’emprim ha el bandunà ses vitg nativ Tavanasa per daventar scolast primar ed ha silsuenter studegià istorgia e litteratura franzosa a Turitg. L’affinitad per il franzos vegn da sia mamma ch’è oriunda dal Vallais.
Ina carriera academica na leva Eric Beer dentant betg far. Per era survegnir in’invista en l’economia privata ha el cumenzà a lavurar tar ina cassa da malsauns. In pass che ha influenzà fermamain sia carriera. Il sectur da sanadad n’ha mai pli laschà star el.
Per scriver ina buna lescha dovri in bun sentiment per la lingua.
Tar l’Uffizi federal da sanadad publica (BAG) ha el elavurà la lescha per il dossier electronic da pazients. Oz lavura el tar La Posta, nua ch’el maina il project per introducir quests dossiers.
Ensemen cun sia dunna Cécile ed ils dus uffants Nolwenn e Mathéo abitescha el al Lai da Genevra.
