Siglir tar il cuntegn

Program d'occurrenzas L'uniun da jazz da Cuira preschenta la nova app MUVA

MUVA – in num che mintgin po dir, che ha da far cun moviment e che tuna schizunt in zic rumantsch. La nova plattafurma digitala duai infurmar e manar persunas interessadas tras occurrenzas culturalas a Cuira. Il november durant la Sonda lunga vegn l'applicaziun testada per l'emprima giada.

Il mument sa chattan sin la nova plattafurma infurmaziuns davart l’occurrenza da la Sonda lunga, che ha lieu bainbaud a Cuira. En il decurs dal temp duain anc dapli cuntegns vegnir vitiers.

Actualmain porscha l'app MUVA trais funcziuns:

  • Infurmaziuns davart occurrenzas actualas.
  • Audios che tractan l'istorgia dals guardians da la notg e dals guardians da la tur, che vivevan e lavuravan pli baud a Cuira.
  • Ina tura auditiva che maina tras las giassas da la citad veglia da Cuira.

L'applicaziun saja in nov instrument per s'orientar en il mund da la cultura. Uschia declera il manader da project e president da l'uniun Jazz Chur Rolf Caflisch l'idea che sa zuppa davos l'app MUVA. L'utilisadra e l'utilisader vegnia infurmà davart ils eveniments actuals, e sper quai possia quel consumar entaifer l'app MUVA divers cuntegns culturals a moda multisensorica.

La nova purschida duai en emprima lingia cuntanscher persunas ch'èn interessadas vi da la cultura. Dentant stat quella er a disposiziun als turists che vegnan sin visita en il Grischun. L'applicaziun è gratuita per tuts.

Rolf Caflisch ist auf dem Bild neben einem Bildschirm, wo die MUVA-APP zu sehen ist.
Legenda: Rolf Caflisch, il mainaproject e president da Jazz Chur. RTR

Durant la Sonda lunga, che ha lieu ils 11 da november, vegn l'app MUVA en funcziun per l'emprima giada. Cun agid da quella gudognan las visitadras ed ils visitaders orientaziun ed els vegnan a savair, cura e nua che las occurrenzas han mintgamai lieu. Suenter la Sonda lunga vegn fatg bilantscha. Sche tut va tenor plan, vulan Rolf Caflisch e ses team schlargiar la purschida e purtar quella en ulteriuras regiuns dal Grischun.

RTR actualitad 11:00

Artitgels legids il pli savens