Questa problematica bada er il giuven garaschist Nico Camenisch. Avant bundant dus onns ha el surpiglià la garascha Roseg e la Veloce Classic Car a Puntraschigna. Malgrà las grondas sfidas ha el decis da far quest pass – er in pau per dar pais a las grondas interpresas. L'impurtant saja er en la branscha d'automobils d'esser creativ. Damai na be reparar autos novs, mabain er sviluppar spartas spezialas. Tschertins sa decidan per ils autos electrics. Il giuven da 22 onns è sa decidì per ils oldtimers, perquai che ses cor batta per ils autos vegls.
-
Bild 1 von 2. Ses cor batta per ils oldtimers. Bildquelle: Nico Camenisch.
-
Bild 2 von 2. Occurrenzas fan part da la vita dal fan dals oldtimers. Bildquelle: Nico Camenisch.
Avant paucs onns badavan ins anc ina gronda discrepanza da lavurar sco dunna en il mastergn da mecanista d'autos, quai saja uss sa midà. Tenor Nico Camenisch fan las dunnas en congual la medema, sche betg ina meglra lavur – cunquai ch'ellas sajan pli fermas en la motorica fina. El engaschass be subit ina dunna en ses affar.
I dat er anc in Nico ordaifer la garascha.
Da surpigliar duas garaschas d'autos n’era betg il siemi da Nico Camenisch, ma el vesa quai sco part da sia via da la vita ed investescha bler temp en il mastergn. Dapi la surpigliada avant bunamain dus onns ha el gì be trais dis liber. Quai èn stads ils dis da chatscha. Per l'entschatta è quai era stà bun.
-
Bild 1 von 3. Sur la tschajera. La Val Bregaglia è in'impurtanta part da la vita da Nico Camenisch. Bildquelle: Nico Camenisch.
-
Bild 2 von 3. A chatscha. L'onn passa èn quai stadas las unicas vacanzas. Bildquelle: Nico Camenisch.
-
Bild 3 von 3. Guarda per ordinari enavant. En la natira chatta Nico Camenisch in tschert equiliber. Bildquelle: Nico Camenisch.
Ma ussa bada el ch'el stuess chattar in meglier equliber da la lavur e da la vita – per betg perder il plaschair vi dal manar las duas garaschas. Quest equiliber chatta el cun ils hobis. Per exempel il sajettar sin columbas d'arschiglia, ma er cun ir cun sia amia a chatscha. In hobi ch'els partan. Il sustegn dad ella ed er da la famiglia valia en la situaziun actuala fitg bler.
Jau stun gugent en il center.
Nico Camenisch è stà quest mattet che chantava il pli dad aut als concerts da scola. E quai è er restà uschia fin en il Coro Bregaglia. Pir là haja la dirigenta ditg, ch'i saja er bun sch'el chantia in zic pli da bass. Cun bler trenament da chant saja el ussa in bun chantadur. Ma insumma chanta el en il cor, per star sin in palc. Uschia saja er stà cler ch'el surpiglia la part da la moderaziun als concerts dal coro.
E cunquai ch'el discurra gugent e n'ha betg fadia da far sbagls, saja el er sa decis da dar l'intervista – er sche ses rumantsch na saja betg il meglier. Nico Camenisch ha pir avant curt cumenzà d'emprender rumantsch, ma per el saja quai impurtant da pudair discurrer la lingua da la val. Ed il resun sin ses rumantsch cun tranteren l'in u l'auter pled bregagliot saja stà fin ussa adina positiv. Pudair communitgar saja l'impurtant vi da la chaussa.