Quai è stada l'Opera Viva 2025 - Aida: tuns pompus e melodias calmas

In giubileum cun grond success

Per il 20avel anniversari sco era la 10avla producziun d'opera ha l'Opera Viva preschentà ina opera gronda e renumada, numnadamain l'Aida. Sut la direcziun dal manader musical, Gion Gieri Tuor hai dà totalmain nov rapreschentaziuns. L'entira producziun è stada in grond success – ord vista organisatorica, ma cunzunt era ord vista musicala: solistas e solists, l'orchester sco era il chor che consista cumplettamain da laics han fatg onur al grond classicher da Giuseppe Verdi.

RTR è stà da la partida ed ha registrà l'entira ovra en furma da video. Ina versiun curta da l'opera cun intgins highlights da l'Aida ed ina u l'autra impressiun da Sandra e Paula Decurtins, ch'èn stadas part dal chor da l'Opera Viva 2025, pudais tadlar en l'«Artg musical»:

Impressiuns da l'Opera Viva 2025

Davart l'ovra

L'opera Aida è in dals gronds classichers da l'opera taliana ed ina da las operas las pli enconuschentas insumma. Ella raquinta ina istorgia d'amur cun intrigas politicas. L'istorgia sa splega en l'Egipta antica. La princessa etiopica Aida viva sco sclava en la curt egipziana. Ella s'inamurescha dal general egipzian Radamès ch'è tranter auter involvì en cumplots politics. Per Aida datti uschè in permanent vi e nà tranter sia amur per Radamès e sia loialitad vers sia patria.

Mamma e figlia amez l'Aida

Ina da las finamiras da l'Opera Viva è da pussibiltar ad in e scadin d'esser ina giada part d'in'opera. Il chor è numnadamain in ensemble da persunas laicas – intgins en gia dapi ditg da la partida, auters savuran per l'emprima giada l'aria d'in palc d'opera. Duas da questas novizas: Sandra Decurtins e sia figlia Paula che chantan uschiglio en il Chor cecilian Trun.

Rudolf Mirer e l'Opera Viva

L'artist indigen Rudolf Mirer ha marcà l'entira istorgia da l'Opera Viva. Tut ils placats da las nov operas passadas sco era da l'actuala derivan dad el. Deplorablamain n'ha il pictur-artist da Sursaissa, ch’è mort ils 12 da schaner 2025 en la vegliadetgna dad 87 onns, betg pli pudì esser part da l'Opera Viva 2025. Sia davosa creaziun: in fund mellen, sin il qual èn da vesair las figuras impurtantas da l'istorgia dad Aida.

L'art grafica da l'Opera Viva: 10 Placats en 20 onns

Avant la premiera

Avant l'emprima rapreschentaziun hai dà anc ina giada in'emna intensiva cun varsaquantas emprovas. Tenor il maestro, Gion Gieri Tuor funcziuna in tal project be sche tut las acturas ed ils acturs sa sentan propi segirs.

Producziuns dal passà