Siglir tar il cuntegn

Header

video
Rita Christen – l'emprima presidenta dals guids da muntogna svizzers
Or da Cuntrasts dals 23.10.2022.
laschar ir. Durada: 25 minutas 46 Secundas.
cuntegn

Rita Christen L'emprima presidenta dals guids da muntogna svizzers

Dapi dus onns è Rita Christen da Mustér la presidenta da l’associaziun dals guids da muntogna svizzers, in’associaziun cun ina enorm gronda maioritad masculina. Mo gest 2,5% dals guids da muntogna svizzers èn dunnas. Quai munta che mo gest 40 dunnas han questa professiun.

Jau n’hai vairamain gì nagina reacziun negativa sin mia canditatura.
Autur: Rita Christen Emprima presidenta da l'associaziun da guids da muntogna

La furmaziun da guida dastgan las dunnas far pir dapi 1977. L’emprima guida è Nicole Niquille stada, ella è vegnida diplomada il 1986. L’emprim um è vegnì diplomà 1906. Ch’i dettia anc suenter 55 onns adina uschè paucas dunnas ch’elegian quest mastergn declera Rita Christen cun il fatg che dunnas han ina pli gronda aversiun envers ristgas. Quai che sa mussa era en las statisticas d’accidents – dunnas han damain accidents.

Dapi ch’ella è presidenta vegn ella adina puspè dumandada tge che l’associaziun fetschia per promover las dunnas.

Nagut. Quellas dunnas che vegnan ston gia esser sin quai nivel. La promoziun sto entschaiver pli baud. Per cletg fan autras associaziuns bler, per exempel il Club alpin svizzer e Giuventetgna e sport.
Autur: Rita Christen Emprima ptesidenta da l'associaziun da guids da muntogna

Oriunda è Rita Christen dad Urnäsch, ella viva dentant dapi prest 30 onns cun ses um Martin Kreiliger e ses dus figls Armon e Julian a Mustér. Ensemen cun ses um ha ella decidì ils onns 1990 da far la furmaziun da guid da muntogna. Dapi 1998 è ella guida. Ella è stada la 9avla dunna che ha fatg ils examens da manar. Oz lavura ella parzialmain sco guida.

Jau hai uschè gugent ils culms, dentant mo culms chat jau lungurus.
Autur: Rita Christen Guida da muntogna

In bun equiliber per la lavur en ils culms è per ella sia lavur tar la dretgira administrativa. Rita Christen è sper guida era anc giurista e lavura parzialmain sco actuara da dretgira.

Tar tut las disciplinas che tutgan tar la lavur da guida è il raiver sia preferida. Il raiver è er in bun equiliber per la lavur intellectuala da giurista. Uschia passenta ella gugent las uschenumnadas pausas da café en halla da raiver. Il pli gugent fa ella quai cun in da ses figls.

Ella è anc adina meglra ch’jau da raiver, era pli ferma che auters giuvens che raivan. Quels guardan lura schon in zic tup, sch’ella dumogna quai ch’els na dumognan betg.
Autur: Julian Kreiliger Figl da Rita Christen

Invista davos las culissas

audio
Bertilla Giossi davart la filmada cun Rita Christen
ord Actualitad dals 21.10.2022. Maletg: RTR
laschar ir. Durada: 5 minutas 23 Secundas.

RTR Cuntrasts 17:25

Artitgels legids il pli savens

Scrollar a sanestra Scrollar a dretga