En in temp, nua che purschidas digitalas domineschan l'advent, sa basa il Museum retic sin ina tradiziun analoga cumprovada: il chalender d'advent teatral.
Dapi passa 20 onns entusiasmescha quest format unic uffants e creschids – ina cumprova che inscunters persunals ed experientschas culturalas han lur lieu fix en ils rituals d’advent. Directur Guadench Dazzi declera en il discurs, daco che questa tradiziun è uschè impurtanta gist oz e co ch'ella tegna il museum en vita.
Ina surpraisa mintga di: Teater e betg portinas
Mintga saira d'advent las 17:15 sa transfurma il Museum retic en ina tribuna per ina represchentaziun da mes'ura. Ma tge spetga als visitaders pitschens e gronds?
Guadench Dazzi na tradescha betg tut, s'allegra dentant fitg a las visitas dals gronds e surtut dals pitschens. Lur visita dettia vitalitad ed il barat cun ils uffants e l'autra gliued ch'è impurtant per mintga museum:
Per in museum d’istorgia nua ch’i vegnan raquintadas istorgias, nua che nus vulain intermediar l’istorgia na sa succeder nagut meglier co sche mintga saira las tschintg curran 30 u 40 uffants si da stgalas ch'èn qua gia dapi 350 onns.
Il lieu e l'ura restan, ma las surpraisas varieschan. Tgi che stat sin tribuna e tge che succeda resta avert fin a l'ultim mument. Per la purschida vasta procura onn per onn l'uniun Kinderkultur Chur, che tscherna ed engascha las artistas ed ils artists. La purschida sa drizza primarmain ad uffants a partir da 5 onns.
Il chalender d'avent teatral, che stat quest onn sut il motto «tradiziun» vegn organisà da l'uniun KinderKultur Cuira.
Fundada ils 1. da settember 2015 a Cuira, s'engascha l'Uniun KinderKultur Cuira per intermediar cultura professiunala ad uffants. L'intent è da pussibilitar experientschas culturalas d'auta qualitad e da promover la participaziun dals uffants a la cultura. L'uniun guarda er dal contact tranter las artistas ed ils artists che fan cultura per uffants.
Enconuschenta è l'uniun sco organisatura dal «Chalender d'advent teatral Cuira». Inizià il 2002 da la citad da Cuira e manà dapi lura privatamain da Patrizia Pavone e Claudia Fürer, attira quest eveniment annualmain circa 1.700 persunas. Quai motiveschia da s’engaschar per questa sporta unica, scriva l’uniun sin sia pagina en la rait.
La forza da l'inscunter analog
En in mund che vegn adina pli fitg dominà d'experientschas digitalas, sa tschenta la dumonda davart la relevanza da purschidas analogas. Per Guadench Dazzi è la resposta clera:
Jau crai chi funcziuna fitg bain precis or dal motiv ch’igl è in’interacziun analoga cun dretgas persunas e betg cun in visur.
Quest inscunter direct, il barat cun auters uffants e l'experientscha culturala che n'è betg da natira materiala, è per il directur dal Museum retic Dazzi ina valur inestimabla. Ins na prenda nagut a chasa, na sto installar nagut, mabain prenda cun sai insatge che fa bain a l'olma.
Cultura per tuts: In museum avert
In aspect impurtant dal chalender d'advent teatral è l'entrada libra. Gist en il temp dad oz, nua che l'advent è savens segnà da commerzi:
Quai fa bain d’avair la pussibilità da far ina sporta gratuita che pussibilitescha a pli bleras persunas pussiblas da participar a cultura e vegnir ina giada en il museum ed emprender ad enconuscher questa chasa.
Uschia daventa il museum in lieu d'inscunter e da barat, che reducescha la tema da l'instituziun ed attira novs visitaders – betg be durant il temp da Nadal, mabain durant l'entir onn.