Siglir tar il cuntegn

Romina Casutt «Jau hai emprendì da tadlar sin mes cor»

Or da trais mais èn daventads passa 10 onns. La Sursilvana pendulescha regularmain tranter la Svizra e la Tansania. Per il mument è ses focus sin sia fatschenta sco planisadra da viadis en la Tansania ed a Sansibar. Igl è in discurs davart sfidas ed il curaschi da suandar l’atgna intuiziun.

L’Africa cun tut sias colurs ha fascinà Romina Casutt oriunda da Falera gia da pitschen ensi. Suenter il studi d’architectura d’interiurs a Lucerna ha ella pachetà sia cofra ed è ida en l’Africa dal Sid per emprender englais. Planisads eran trais mais en la Citad dal Cap. Cura ch’igl è puspè stà temp da turnar a chasa, ha ella decis da restar pli ditg.

Quella citad, la Citad dal Cap, ha dà a mai insatge tut spezial. Jau sun immediat sa sentida fitg cuntenta.
Autur: Romina Casutt ha abità tschintg onns en la Citad dal Cap

Quest nov sentiment da vita african ha immediat attratg la giuvna che aveva da quel temp 25 onns – ina nova aventura ha uschia cumenzà. Per pudair finanziar sia vita en il sid è ella adina puspè turnada per intgins mais en Svizra.  

Impressiuns da la vita en l'Africa

Da Falera a Tansania – da l'architectura al turissem

Suenter tschintg onns en la Citad dal Cap, bleras differentas plazzas da lavur, ina relaziun ch’è ida dapart ed in viadi da trais mais tras set pajais africans è Romina Casutt turnada l’onn 2018 enavos en Svizra per puspè fitgar pe sco architecta d’interiurs. Fisicamain era ella bain en Svizra, il cor è dentant restà en l’Africa. Ussa hai duvrà curaschi. Curaschi da suandar l’atgna intuiziun senza savair nua che la via va. Midar clamada, midar continent.

Il davos di dal temp da prova hai rimnà tut mes curaschi e ditg a mes schef: Jau stoi ir enavos en l'Africa.
Autur: Romina Casutt architecta d'interiurs

Uschia ha la via manà ella a Daressalam. Dapi set onns viva Romina Casutt uss en la pli gronda citad da la Tansania. Actualmain para ella dad avair chattà ses cletg: planisadra da viadis individuals, cunzunt per giasts da l’Europa. Ina lavur che pussibilitescha da cumbinar omadus munds – il svizzer e l’african. L’aventura po damai cuntinuar.

Ulteriurs profils

Profil 09:00

Artitgels legids il pli savens