So? Puspè gigins? schubers? Sober? Nüachtern? Ha? Lura pudain entschaiver…
Grischun na baiva nagut!
Jo kasch tenka! Dentant almain pli pauc che la media svizra: En il Grischun èn 3.9% da la populaziun periclitads da daventar alcoholicras u alcoholichers. Tenor l'organisaziun mundiala da sanadad WHO cumenza ina ristga media fin auta per la sanadad a partir d'in consum quotidian da 20 grams alcohol (dunnas) resp. 40 grams (umens). 20 grams correspundan a dus magiels standard. La media Svizra da la cumpart da las persunas cun consum en questa u pli auta dimensiun è stada il 2017 tar 4.6%.
| GR | CH | Delta | |
| Total | 3.9% | 4.6% | 0.7 |
| Umens | 4.6% | 5.2% | 0.6 |
| Dunnas | 3.2% | 4.1% | 0.9 |
| 15-34 onns | 3.1% | 4.8% | 1.7 |
| 35-49 | 2.9% | 3.3% | 0.4 |
| 50-64 | 4.1% | 4.5% | 0.4 |
| 65+ | 5.7% | 6.3% | 0.6 |
| Perchasa d'ina persuna | 5.4% | 5.7% | 0.3 |
| Pèr senza uffants | 4.5% | 5.0% | 0.5 |
| Pèr cun uffants | 2.1% | 3.4% | 1.3 |
| Perchasa d'in genitur | 1.8% | 5.8% | 4.0 |
Funtauna: Uffizi federal per statistica - Enquista da sanadad Svizra 2017
Persunas pli veglias paran pli periclitadas ch'ils auters e cun uffants en il perchasa sa sbassa la ristga. La ristga la pli pitschna han en il Grischun persunas ch'abitan en in perchasa cun uffants e mo in genitur. Mo quai para d'esser ina spezialitad Grischuna. En Svizra tutga questa gruppa tranter quellas che pericliteschan lur sanadad il pli fitg cun il consum d'alcohol.
En Svizra quinta ins cun tut en tut 250'000 persunas ch'èn dependentas da l'alcohol.
Cumbat cunter l'alcoholissem uschè vegl sco il vinars
Ma tge lain scriver sch'i ha sura in video, ha? Guardar il video! Ed i na dat era nagina reclama davant ora! Nus n'essan bain betg Blick e 20minutas e consortas!
Cumbat actual
En il Grischun hai era en temps moderns adina puspè dà campagnas cunter il maldiever da l'alcohol. Da preschent vegn elavurada dal Chantun ed acturs externs ina nova «strategia dependenza». En ina evaluaziun saja vegnida chattada ina rait da prevenziun ed agid vasta, regiunala ed adattada als basegns locals, hai gì num da l'Uffizi da sanadad dal Grischun sin dumonda da «RTR – la show». Tuttina dettia inquala rusna ch'i valia anc da stuppar ils proxims onns. Las expensas dal Chantun cunter dependenzas muntan ad actual CHF 360'078 l'onn. Part da questa summa fan p.ex. las cumpras da test d'alcohol en stizuns. Quest post munta a 20'000 francs l'onn. Las cumpras vegnan fatgas sin giavisch da singulas vischnancas tras l'organisaziun Crusch Blaua che s'engascha cunter l'alcoholissem e per las unfrendas da lez.
I giess senza
Bavrondas «senza» sco la biera senza alcohol èn trendy. L'offerta è quasi explodida ils ultims onns. Tar negozis sco Migros e Coop crescha il sortiment constantamain. Sulet tar la Migros pon ins chattar da quai da 15 sorts biera senza alcohol. Gins e bitters ed auter senza alcohol emplainan era ils regals. Carlsberg p.ex. ha 15 – 17% carschientscha mintg'onn per lur gervosas senza alcohol. La biera senza alcohol da Carlsberg cun il pli grond success è quella da la marca Feldschlösschen.
Mo tuttina han products ch'emprovan d'emular bavrondas alcoholicas anc adina in problem en la fiera. L'argument «sche insumma, lura cun» para anc da giugar ina rolla ferma. Quai sa mussa gist tar la biera senza alcohol. La cumpart da la vendita da biera senza alcohol vi da la vendita da tutta biera en Svizra è sut 10%.
ed uss: GUARDAR LA SHOW! Incl. Giana Rant questa giada. Giana Rant? FAR IN CLIC SIN IL VIDEO E GUARDAR!
Danor, sche Vus fissas da Domat, lura scrivai Vossa reclamaziun per plaschair sin lashow@rtr.ch
Tuttina grazia.
Ed uss: CLICCAR SIN IL VIDEO!!!!
