L’um da fatschenta da San Murezzan Martin Andreas Staub (50) vegn chattà en in lai da ses agen sang – assassinà brutalmain sin ses allevament da chavals a la Côte d’Azur. Quai è stà ils 30 da settember l’onn 2003.
Uss tractan la redactura Fabia Caduff ed il redactur Gion Caviezel quel cas brutal en lur podcast da true crime «True Crime Grischun» – l’unic podcast da true crime rumantsch. En in’emissiun live speziala na raquintan els betg be da quest cas or da la high society da San Murezzan che ha fatg furora era sur cunfin, mabain era da lur passiun per «la sgarschur en las ureglias», da las sfidas durant las retschertgas – ed en quest cas, da lur intervista commoventa cun il figl creschì da la victima.
Sper lur raquints d’assassins zuppads sin tualetta, dal numer da murdraretschs sin incumbensa en Svizra e da resgias da motor en la valischera preschentainsa anc dus auters cas criminals dal podcast True Crime Grischun – ina giada svanescha in uffant e l’autra tracta da partituras bagnadas da cocain.
