«Nus essan uss sin buna via», manegia Reto Pfister che presidiescha il comité d'organisaziun che prepara il project «Mund sutsu» davent l'atun. En il center na stat betg noss mund ch'è sutsura cun tut ses conflicts e sia geopolitica.
Per noss giubileum avain nus mess sin tribuna ina nova istorgia cun nova musica. Nus essan cun noss 20 onns daventads maiorens ed en tscherts reguards era creschids.
La Scola da chant Surselva exercitescha in'aventura musicala per grond e pitschen cun ses 80 uffants e giuvenilas e giuvenils.
Massa fantasia, chant ed effects
Il matg 2016 ha la Scola da chant Surselva – lura anc numnada «Chor d'affons Surselva» – preschentà l'emprima giada in gieu musical pli grond. Per festivar ils 10 onns aveva la dirigenta inizià ina inscenaziun cun il titel «D'in affon che viveva sin ina plonta». Il chor aveva preschentà 13 cumposiziuns da Flavio Bundi cun texts da Roman Weishaupt. La producziun da lura aveva muentà, divertì e sveglià emoziuns. Il scenograf Remo Arpagaus aveva contribuì e Marina Blumenthal persvadì en ina rolla centrala sin tribuna cun blera fantasia, effects e natiralmain chant dals uffants.
Suenter quest punct culminant ha l'istorgia dal «Chor d'affons Surselva» cuntinuà en autra furma. L'onn 2019 è el sa mess sut il tetg da la Scola da musica Surselva ed ha midà ses num a «Scola da chant Surselva». Cun Judit Scherrer ha Rilana Cadruvi dastgà beneventar ina pedagoga che ha rinforzà las structuras e sustegnì essenzialmain il svilup dal chor.
Musica da Lorenz Dangel
Actualmain exerciteschan 80 uffants in gieu musical nov. Els ed ellas chantan en quatter gruppas da vegliadetgna che portan mintgamai il num d'in utschè: ils pitschens èn ils paslers, ils uffants da l'emprima e segunda classa ils masets, quels da la terza fin tschintgavla classa las lodolas ed ils gronds las luschainas. Quellas quatter gruppas s'uneschan en il gieu musical giubilar «Mund sutsu». Il public dastga puspè sa legrar d'in spitachel plain colurs.
Il famus cumponist tudestg Lorenz Dangel ha scrit la musica, David Flepp e Susan Rupp han creà il libret.
Igl è in viadi nair sin la mar, en il qual realitad e ficziun sa maschaidan.
Tenor David Flepp duain ins s'imaginar la situaziun d'ina persuna che sa chatta tut suletta sin ina bartga entamez la mar, circumdada d'undas e d'ina stgirenta notg. Plain anguscha na sa ella betg tge far. Sut la persuna è ina mar plain creatiras, sur ella il tschiel stailì.
La muetta baterluna
Co il viadi cuntinuescha e co el finescha na vul nagin tradir. Ins duai visitar il musical sez u sezza ed emprender d'enconuscher la muetta baterluna che vul salvar la persuna. Il maletg da tribuna d'Annadora Friberg dat in vestgì animant ed inspirant a l'inscenaziun «Mund sutsu». In ensemble d'otg musicists e musicistas sut la direcziun da Clau Scherrer accumpogna il gieu. Per las ideas dals costums è Remo Arpagaus responsabel.