Curt avant ch'i va liber hai num da sa preparar e dar tut. Ils 80 uffants da la Scola da chant Surselva sa transfurmeschan plaunet en muettas, octopus ni en monsters.
L'atmosfera en la stanza d'emprova è plain energia e tensiun. Ins senta, qua capità prest insatge.
Cler essan nus in zic gnervusas. Nus avain investì bler temp en quest project. Ma, ussa ans legrain nus sin la premiera – quai vegn cool!
Punct a las set, la sala dal center communal a Trun è bain fullanada. Tuttenina audan ins ina vusch pregnanta. Ella tira il public en in «mund sutsu» – ed uschia va liber in'aventura musicala che maina il public directamain en in mund fitg abstract, in mund che mintgin enconuscha: noss dadens, nua ch'ils siemis e desideris, ma era in u l'auter monster en furma da dubis e temas vivan.
Sin tribuna vegn quel «mund sutsu» inscenà sco la mar: stemprads, pirats, monsters dentant era steilas e balenas che gidan da chattar ina via franca. Ina aventura musicala che sa tracta da desideris e cunzunt dad il curaschi da suandar quels.
Premiera gartegiada
Durant ina ura dattan ils uffants tut. E cun grond levgiament pon las chantaduras e chantadurs pigliar encunter l'applaus. Cuntainta è era la dunna che ha manà quai project «Mund sutsu», Rilana Cadruvi Scherrer.
Jau sun fitg cuntainta ed engraziaivla che tut è i bain. Jau hai grond tschaffen.
La premiera è stada bain occupada da mammas e babs, augs ed ondas, tats e tattas, ma era da persunas che han simplamain gì marveglias. Las reacziuns eran tar tuts e tuttas fitg sumegliantas: ina prestaziun grondiusa. E – sco ch'ils organisaturs han gì l'intenziun – ha er in u l'autra aspectatura piglià cun sai il messadi central.
En cuminanza pon ins dumagnar tut. Quai è fitg in bel messadi.
Il giubileum da 20 onns chor d'uffants da la Surselva vegn cun quist project e cun la prestaziun dals uffants celebrà sco ch'i tutga. Suenter la premiera gartegiada hai dentant num da sa recrear e tancar energia per prest puspè savair sfundrar plain elan en il «Mund sutsu». Trais preschentaziuns datti numnadamain anc.
Las lavurs da preparaziun
«Nus essan uss sin buna via», ha manegià Reto Pfister che presidiescha il comité d'organisaziun anc avant in pèr dis.
Per noss giubileum avain nus mess sin tribuna ina nova istorgia cun nova musica. Nus essan cun noss 20 onns daventads maiorens ed en tscherts reguards era creschids.
La Scola da chant Surselva exercitescha in'aventura musicala per grond e pitschen cun ses 80 uffants e giuvenilas e giuvenils.
Massa fantasia, chant ed effects
Il matg 2016 ha la Scola da chant Surselva – lura anc numnada «Chor d'affons Surselva» – preschentà l'emprima giada in gieu musical pli grond. Per festivar ils 10 onns aveva la dirigenta inizià ina inscenaziun cun il titel «D'in affon che viveva sin ina plonta». Il chor aveva preschentà 13 cumposiziuns da Flavio Bundi cun texts da Roman Weishaupt. La producziun da lura aveva muentà, divertì e sveglià emoziuns. Il scenograf Remo Arpagaus aveva contribuì e Marina Blumenthal persvadì en ina rolla centrala sin tribuna cun blera fantasia, effects e natiralmain chant dals uffants.
Suenter quest punct culminant ha l'istorgia dal «Chor d'affons Surselva» cuntinuà en autra furma. L'onn 2019 è el sa mess sut il tetg da la Scola da musica Surselva ed ha midà ses num a «Scola da chant Surselva». Cun Judit Scherrer ha Rilana Cadruvi dastgà beneventar ina pedagoga che ha rinforzà las structuras e sustegnì essenzialmain il svilup dal chor.
Musica da Lorenz Dangel
80 uffants han fatg part al gieu musical nov. Els ed ellas chantan en quatter gruppas da vegliadetgna che portan mintgamai il num d'in utschè: ils pitschens èn ils paslers, ils uffants da l'emprima e segunda classa ils masets, quels da la terza fin tschintgavla classa las lodolas ed ils gronds las luschainas. Quellas quatter gruppas s'uneschan en il gieu musical giubilar «Mund sutsu». Il public dastga puspè sa legrar d'in spitachel plain colurs.
Il famus cumponist tudestg Lorenz Dangel ha scrit la musica, David Flepp e Susan Rupp han creà il libret.
Igl è in viadi nair sin la mar, en il qual realitad e ficziun sa maschaidan.
Tenor David Flepp duain ins s'imaginar la situaziun d'ina persuna che sa chatta tut suletta sin ina bartga entamez la mar, circumdada d'undas e d'ina stgirenta notg. Plain anguscha na sa ella betg tge far. Sut la persuna è ina mar plain creatiras, sur ella il tschiel stailì.