Il Calender romontsch 2022
En il «Calender romontsch 2022» va il bustab C tras tut las contribuziuns. Sper la cultura, creativitad e colurs, vegn tematisà il cumbat da las dunnas per l'egualitad da dretgs. Era il curs da la vita ed il cumià èn rubricas tradiziunalas dal «Calender romontsch». E natiralmain na dastga betg mancar il C da corona che survegn quest onn schizunt in agen chapitel.
Il Chalender ladin 2022
Art e litteratura han sco mintg’onn in plaz spezial en il «Chalender ladin», sco era las contribuziuns dad uffants e giuvenils. En la rubrica Natira vai per il tschess barbet e per prads sitgs unics en la Val Müstair. Il Chalender ladin sa preschenta en in vestgì frestg e plain colurs.
Il Chalender per mintga gi
Il «Calender per mintga gi» va sur ils cunfins dals idioms ora e cuntegna contribuziuns en sursilvan ed en sutsilvan. Tipic per il chalender da las valladas renanas è ch’el dat ina vusch al pievel. Il carnet separat «la tiba» cun istorgias, engiavineras e sgnoccas è pensà pels uffants.
Revista digl noss Sulom
La «Revista digl noss Sulom» è il chalender tradiziunal per il Grischun central e cuntegna texts surmirans e sutsilvans. Perquai ch’i ha duvrà blera passiun per realisar tants onns il Sulom, sco ins vesa, è il pais tematic quest onn «Passiuns». 100 persunas raquintan per tge ch’ellas han ina passiun: ir cun skis, chantar e bleras autras chaussas pli spezialas sco avieuls u tartuffels.
