Siglir tar il cuntegn
cuntegn

Sin il viv – 25 onns Impuls Impuls «live» da Domat

«Sin il viv!», la turnea per festivar ils 25onns da l’emissiun Impuls dal Radio Rumantsch sa ferma per la settavla ed ultima giada, quai durant ils Dis da Litteratura (DDL) a Domat, dumengia ils 4 da november 2018 a las 10:30 en il salun da coiffeur Haaratelier, Gassa Suto 43a, Domat.

Il salun da coiffeur Haaratelier, Gassa Suto 43a, Domat, settavel lieu da la turnea «Sin il viv!».
Legenda: Il salun da coiffeur Haaratelier, Gassa Suto 43a, Domat, settavel lieu da la turnea «Sin il viv!». mad, Haaratelier

Er grazia a l’emissiun Impuls è la scena da litteratura rumantscha oz viva e vasta sco anc mai. Perquai envida RTR, en collavuraziun cun la Lia Rumantscha, da festivar il giubileum da 25 onns Impuls cun la turnea da lectura: «Sin il viv!». Durant quest onn è quella sa fermada gia sis giadas là nua ch’ils Impuls vegnan uschiglio tadlads, en lieus dal mintgadi da las audituras e dals auditurs da radio. La settavla ed ultima lectura da la turnea ha lieu il cumenzament da november en in salun da coiffeur a Domat.

Jessica Zuan, Myriam Pelican, Carlo Beer e Sidonia Pazeller.
Legenda: Jessica Zuan, Myriam Pelican, Carlo Beer e Sidonia Pazeller. mad, RTR

Per quest finale vegnan a preleger ils trais pli novs auturs d’Impuls Carlo Beer, Sidonia Pazeller, Jessica Zuan e l’autura Myriam Pelican texts novs e vegls, divertents e trists davart las rimas tranter las lingias (il tema dals Dis da litteratura a Domat), sur dal scriver per surviver, sur da chignons ed autras frisuras, da sfendachavels u da glieud cun pail sin ils dents!

Questa ultima ediziun da «Sin il viv!» metta il focus sin l’aspect impurtant da la promoziun da «novAs auturAs», che l’emissiun Impuls fa dapi il 1993. Las redacturas responsablas per Impuls, fin 2016 era quai Rita Uffer e dapi lura Flurina Badel, han numnadamain adina er ina funcziun da tschertgatalents. Pliras scripturas e plirs scripturs han perfin fatg lur emprims pass litterars en il public cun scriver impuls. Uschia per exaimpel er Sidonia Pazeller (*1998), actualmain la pli giuvna autura d’impuls che vegn a preleger a Domat. Ella è creschida si a Tarasp, ha fatg matura e studegia biologia e rumantsch a l’Universitad da Turitg. Sidonia Pazeller scriva pir dapi quest atun per l’emissiun Impuls. Per ses texts gioga ella gugent cun clischés e scriva adina cun ina buna purziun umur.

Ed er Carlo Beer (*1985), ch’è creschi si a Sedrun e studegia reschissur e librettist da film a la Scola Auta d’Art (ZHdK), na scriva anc betg daditg per Impuls ed uschiglio n’ha el anc mai publichà ses texts, persuenter scriva el istorgias che van sut la pel.

Pli encunuschenta è la poetessa Jessica Zuan (*1984). Ella ha publitgà cun success ses emprim tom da poesias «L’orizi / La tempête» (poesias, edition Samizdat) l’onn passà. Per l’emissiun Impuls scriva e publitgescha ella uss per l’emprima giada er texts da prosa: istorgias poeticas da ses mintgadi a Barcelona, nua che Jessica Zuan viva cun sia famiglia.

La quarta autura da quest quartet empermettent è, tschernida bel ed aposta per Domat, Myriam Pelican che scriva impuls en il pli bel dialect da Domat. Ella ha frequentà il seminari scolastic a Cuira. Suenter ha ella lavurà sco redactura tar il Radio Rumantsch. Uss è ella scolasta, pura, mamma e cura ch'i va, scriva ella per exempel prosa curta spiertusa per l’emissiun Impuls, quai dapi l’onn 2011.

La turnea è publica, l’entrada libra e per finir la prelecziun datti in aperitiv preparà dals ospitants per far printgas sin la litteratura rumantscha.

Impuls 06:00