El è il «mister chatscha» ubain er il «mister luf» dal Grischun, mintga chatschader e mintga chatschadra enconuscha el: Adrian Arquint. Sco co-manader da l'Uffizi da chatscha e pestga è Arquint tranter auter responsabel per realisar la politica federala e chantunala da chatscha e pestga.
Er la protecziun d'animals periclitads ed il management d'animals da rapina gronds è ina da las incumbensas centralas da l'Uffizi. E gist quell' incumbensa procura e survegn dapi blers onns attenziun mediala e politica. La preschientscha, la gestiun sco era la regulaziun dal luf, occupescha en moda particulara.
Ed igl è er quest tema che chaschuna adina puspè discussiuns cuntraversas tranter aderents ed adversarias.
Nossa incumbensa è d' infurmar e da declerar a moda uschè clera e transparenta sco pussaivel.
Ina depressiun da spussada il 2022, ha gì per consequenza che Arquint ha stuì sa retrair per pli lung temp. «Incumbensas simplas, sco per exempel ina spassegiada, èn daventadas ina sfida», uschia Arquint.
Jau aveva simplamain exagerà.
In'experientscha speziala per il veterinari. Il sustegn da sia famiglia e da ses patrun da lavur è stà decisiv per sia reconvalescenza.
El accentuescha, quant impurtant ch'igl è da vesair e da respectar ils agens cunfins ed ha emprendì da metter da nov sias prioritads per chattar ina sauna ballantscha tranter professiun e vita privata.
10 dumondas curtas
- Chatscha u pestga? Chatscha.
- Per ina ferma regulaziun dal luf u acceptar ch'i dat adina dapli? 50:50.
- Dapli reservats u dapli libertads per chatschaduras e chatschadurs? Dapli libertad.
- Fascinaziun per in grond tschierv ubain in capricorn? Capricorn.
- Animals da rapina en il parc naziunal: sajettar en cas spezials u laschar viver en mintga cas? Laschar viver.
- Vegni a dar ils proxims 10 onns ina populaziun d'urs en il Grischun? Na.
- Ir a chatscha: pli gugent en gruppa u pli gugent sulet? En gruppa.
- La patenta per la chatscha auta custa quest onn 805 francs. En 10 onns: 1'000 ubain 1'200 francs? 1000 francs.
- Chatscha sco passiun ubain sco incumbensa? Passiun.
- Midada dal clima: in privel per ils animals u ina schanza per novs animals? 50:50.
Adrian Arquint è creschì si a Scuol ed ha studegià medischina veterinaria a l'Universitad da Turitg, nua ch'el ha era doctorà. Tranter ils onns 2002 e 2009, è el stà veterinari d'assistenza per animals pitschens e gronds.
Dapi il 2009 lavura el per il chantun Grischun, nua ch'el ha surpiglià la direcziun da l'inspecturat da la producziun primara tar l'Uffizi per la segirezza da victualias e per la sanadad dals animals en l'agricultura, avant da surpigliar l'Uffizi da chatscha e pestga.
«50:50» – il videocast communabel da Somedia e RTR
Somedia e Radiotelevisiun Svizra Rumantscha RTR porschan cun il format da talk «50:50» in nov product communabel. Il videocast vul promover mintga mais discurs approfundads cun represchentantas e represchentants da l'economia, da la politica e da la societad.
Noss osps
Pertge il num «50:50»?
- Equiliber e diversitad: il num dal videocast accentuescha las stentas da preschentar ina selecziun da giasts equilibrada e diversa per represchentar ina paletta vasta da chaus e persunalitads.
- Simplicitad e clerezza: In num simpel e chapibel sco «50:50» associescha directamain l'idea fundamentala dal podcast, senza stuair declerar bler dapli.
- Simbol da fairness: La relaziun da 50:50 vegn duvrada savens sco simbol per fairness ed egualitad – quai che correspunda bain er a las finamiras dal podcast.