Sin l'entir mund na pon 244 milliuns uffants en la vegliadetgna da scola betg ir a scola. Damai n’ha quasi mintga tschintgavel uffant nagin access a la furmaziun. Savens sajan quels uffants exposts ad ina ristga augmentada da povradad ed exclusiun sociala. Quai scriva la Chadaina da Fortuna sin sia pagina. Era persunas giuvnas en Svizra sajan pertutgadas. Tar nus n’haja mintga 10avla persuna nagina finiziun da scola.
Donaziuns a favur d’organisaziuns da furmaziun speziala
La Chadaina da Fortunaorganisescha ensemen cun la SRG SSR in di naziunal da solidaritad e quai ils 21 da december 2023. La Capriola è ina da las fundaziuns grischunas che ha er gia survegnì sustegn finanzial da la Chadaina da Fortuna, quai avant dus onns a chaschun da quest di da solidaritad.
Quai è grondius che la Chadaina da Fortuna ha sustegnì La Capriola. Nus purschain in da chasa ed in lieu, nua ch’ins ha chapientscha per persunas giuvnas, ch'han in basegn da sustegn. E nua ch’ins ha pazienza cun quai co quellas persunas èn ed ageschan.
La Capriola porscha ina scolaziun a giuvens e giuvnas che pateschan da differents problems psichics. Damai persunas che dovran sustegn. Quai fa La Capriola cun in concept da scolaziun spezial ed ensemen cun manaschis partenaris en ils secturs d'hotellaria e gastronomia sco er en il commerzi en detagl.
I fa senn che quellas persunas vegnan integradas directamain sin l’emprim martgà da lavur.
Co che quest concept da scolaziun spezial è cumponì e co ch'il sustegn a favur da las persunas giuvnas vesa or, quai explitgescha il mainafatschenta da La Capriola, Conrad Cadonau, en Vita e cretta. El di era tge ch’è impurtant en connex cun accumpagnar talas persunas en ina vita autonoma. Ed ina da quellas persunas, Annica Curschellas, raquinta, tge experientschas ch’ella fa e co ch’ella profitescha da la scolaziun tar La Capriola.
