La gruppa da teater da Sent è vegnida fundada l’onn 1984. En occasiun dal giubileum da 40 onns aveva la gruppa preschentà avant dus onns il gieu liber: «Che capodovra». Uss dus onns suenter las festivitads da giubileum fa la gruppa da teater da Sent in ulteriur regal. La gruppa preschenta cun «Il vitürin Muntantsch» il toc ch’ella aveva preschentà sco emprim toc durant l’onn da fundaziun da la gruppa il 1984.
Mussar co la vita era la segunda mesadad dal 19avel tschientaner
Muntatsch viva ensemen cun sia dunna Mengia, la figlia nov naschida e la fantschella Nanna en in lieu da cura. La dunna Mengia mora, la figlia Grettina era. Uschia è il viturin Muntatsch avisà anc pli ferm sin l’agid da la fantschella Nanna e dals viturins che procuran per ils chavals en stalla ed ils affars. Muntatsch marida la fantschella. La mort da la dunna e da la pitschna figlia fan dentant adina dapli fastidi a Muntatsch. El as perda pli e pli en pensiers, reproschas e l’atgna culpa. Ils affars van adina pli al main, Muntatsch na vesa pli in futur, demunis prendan suramaun.
Drama che va sut la pel
Fitg autentic mussa la gruppa da teater da Sent co che la vita era avant 160 onns, lura cura che la glieud n’aveva nagut. Da mussar quai era ina da las sfidas era envers las numerusas giuvnas acturas ed ils giuvens acturs che fan part al teater, di il reschissur Christian Hänny. Ozendi sa ins simplamain trametter in messadi cun il telefonin sch'ins ha in problem. Da lez temp avev’ins da discurrer in cun l’auter sche insatge n'era betg bun.
Emprova generala 'Il vitürin Muntatsch'
-
Bild 1 von 4. Il vitürin Muntatsch. Bildquelle: RTR.
-
Bild 2 von 4. Festa vi'd maisa. Bildquelle: RTR.
-
Bild 3 von 4. Il camarier Gion. Bildquelle: RTR.
-
Bild 4 von 4. Fin da l'emprova generala. Bildquelle: RTR.
Dapi il schaner vi da las emprovas, uss sa legran tuts sin las represchentaziuns
Ditg ha la gruppa da teater da Sent fatg emprovas per las producziuns dal drama «Il vitürin da Muntatsch». Suenter tschintg mais è la gruppa uss cuntenta da pudair preschentar il toc al public. Las emprimas preschentaziuns èn la fin d'emna dals 29, 30 e 31 da matg. Ulteriuras preschentaziuns datti er la fin d'emna dals 5 e 6 da zercladur.