Tempra d'advent - Chanzuns da Nadal – in'impurtanta part per la cultura rumantscha

Per enconuscher la chanzun «Last Christmas» da Wham! na dovri betg blers tuns. Il medem vala era per «All I want for Christmas» da Mariah Carey. Durant il temp d'advent sa chattan quellas duas chanzuns mintg'onn da nov davanttiers en la parada da hits svizra.

«Il fist cun las brunsinas, chantar da naiv, dal Son Niclà – simplamain giugar cun tut ils clischés», quai èn tenor noss redactur da musica Dominic Pohle insatge che tutga simplamain tar ina tipica chanzun da Nadal. Ils davos onns edeschian adina dapli musicists e musicistas chanzuns per il temp d'advent. «Jau enconusch strusch insatgi che n'ha anc betg almain edì ina chanzun da Nadal», di Dominic Pohle.

Da menziunar spezialmain sajan il chantadur canadais Michael Bublé che saja s’etablì sco chantadur da Nadal ed era la band dad a cappela Pentatonix che haja edì ils davos onns bunamain be disc cumpacts da Nadal. Era da la musicista australiana Sia e da la chantadura americana Cher pon ins tadlar chanzuns da Nadal – dentant hajan quellas in zic in'autra tempra, manegia Dominic Pohle. Pli pauc romantica e kitsch, persuenter dapli electronica e rock.

Ma i dat era chanzuns da Nadal che vegnan chantadas en Rumantschia: Il pitschen schumbrader dals Furbaz, il siemi da Nadal chantà per exempel dad Alexi e Marcus u era pli veglias sco «Clara notg» u «Dorma, dorma bel bambin».

I dettia chanzuns rumantschas da Nadal che vegnian anc chantadas da chors, en baselgia u era en scolas, di la musicologa Laura Decurtins. Ma il fatg ch'i vegnia en general adina chantà damain, haja er influenza sin las chanzuns da Nadal. Savens na vegni betg pli chantà a chasa ed er en scola vegni betg pli mess tanta paisa sin far musica ed uschia giajan quellas chanzuns rumantschas da Nadal toc a toc a perder, di Laura Decurtins. E sch'i vegnia chantà, lura plitost las chanzuns per englais ch'ins audia era bler en il radio e che vegnian promovidas pli fitg da l'industria da musica.

Ina chantadura rumantscha che fa dapi onns musica da Nadal è Marie Louise Werth. L'entschatta sco chantadura da la gruppa Furbaz ed ils davos onns adina dapli era cun sia band. Quest onn èsi la 18avla turnea da Nadal che porta il num «L'Amur da Nadal» e quai cun concerts tranter auter a Cuira, Son Gagl e Glaruna. Daco sa decida ella adina ed adina puspè da concertar en quella moda?

E ch'ils concerts da Nadal da Marie Louise Werth han lur atgna tempra mussa la schelta da las chanzuns: Era «Oh Happy Day» u chanzuns dad Abba s'audan tier il repertori da la musicista oriunda da Mustér en Surselva – malgrà ch'ellas èn betg tipicas chanzuns da Nadal.

Marie Louise Werth e band durant il soundcheck