Ils mauns dad Anna Laura Klucker èn ina part fitg impurtanta da ses corp – gea, els èn ses chapital. La giuvna dunna da fatschenta fa lavurs a maun. Oravant tut cusa ella. Tranter auter ils vestgids elegants da nozzas e da festas ch’ella creescha per ses agen label da moda. Mintga singul è in unicat. In detagl caracteristic che sa tira tras – quasi sco fil cotschen – è il pitg da crusch tradiziunal grischun che decorescha mintga vestgì. Scuvert ha Anna Laura Klucker il pitg da crusch durant ses studi a la Scola auta dals arts a Turitg.
Far lavurs a maun è definitivamain insatge meditativ, ins sto sa prender peda persuenter, nagut va spert spert. Ed i nascha, i daventa insatge, quai è nunditg bel.
Ils vestgids n’èn dentant betg ils unics products che Anna Laura Klucker fa. Ella ha er in maun per crear maletgs e per cuser tastgas ed auters accessoris da tgirom. Ed er per quai ha la dunna giuvna gì in’idea speziala: Ella lavura cun tgirom da tschierv che vegniss bittà davent suenter la chatscha.
Da mes mauns poss jau ma fidar. Quels dis che nagut gartegia datti però er. Alura è quai adina ina schanza d’ir in’autra via, d’entschaiver danovamain. Quai avra novs munds.
Danunder che questa energia e forza creativa dad Anna Laura Klucker vegn, pertge ch’ella fa insumma lavurs a maun schebain che bler pudess era vegnir fatg da maschinas e tge che la lavur manuala ha da far cun sia identitad e cun ses mauns plitost pitschens e fins, tut quai raquinta ella a Vita e cretta a chaschun da nossa visita en ses atelier a Tumein.