Curdin Nicolay
Curdin Nicolay, naschì l'onn 1981 e creschì a Bever, pendulescha oz tranter Lucerna e Berna. Sias influenzas musicalas partan da las chanzuns da Paulin Nuotclà – ses barba – e tanschan fin tar la ramur dals Nirvana. Ina pezza ha el sunà ghitarra en ina band engiadinaisa, oz preferescha el scriver sias atgnas chanzuns en moda da «zambregiader» solitari – cun pauca prescha per il palc.
Sin la cumpilaziun alternativa rumantscha «accent», cumparida la primavaira 2007, figurescha el tranter las truvaglias – il chantautur ladin Curdin Nicolay, cun sia ballada dal «Kindl», ina chanzun d'in discurs laconic en il tren. En ina sumeglianta tunalitad turna il giuven musicist da Bever cun sia contribuziun al nov Top Pop Rumantsch: «E schi nu naiva, lura plouva, e schi plouva fissa meglder schi navess». Cun ina poesia schlantga ed associativa descriva la chanzun in lieu nua che pauc capita, danor ils baggers che lavuran or sin ils prads. «Nüglia da nouv» di il titel apunta. Il producent Manfred Zazzi ha contribuì al toc la tempra ritmica dals trubadurs dad ozendi. Il groove suttastritga la frasa clav da la chanzun: «Vairamaing saja bain che chi'm manca». Tge, gliez è surlaschà a la fantasia da l'auditur.
Realisaziun
Interpret, musica e text: Curdin Nicolay
Producziun: Manfred Zazzi
Battaria: Muso Stamm
Bass: Danny Hertach
Ghitarras: Jean-Pierre Von Dach
Text da la chanzun: Nüglia da nouv
E schi nu naiva, schi lura plouva
e schi plouva, füssa meglder schi navess
vairamaing saja bain che chi'm manca
Uoss' eschan qua fingià üna ter pezza
i nun es nüglia da nouv, minchün chi'ns cugnuoscha
coura sül prà lavuran ils baggers
chi sa schi fan il paradis
Eu sun Engiadinais e tü m'hast dit ch'eu guarda tais
meis bazegner d'eir'ün paur, incas
meis bap es sülla glüna e ma mamm'es sü Muntatsch
d'ingionder voust ch'eu sa quai
E schi nu naiva, schi lura plouva
e schi plouva, füssa meglder schi navess
vairamaing esa cler che chi manca
No eschan qua e guardain our da fanestra
tü guardast a dretta ed eu guard a schnestra
coura sül prà chavan ils baggers
sco sch'ün da no stess ir
Eu sun Engiadinais e tü m'hast dit ch'eu guarda tais
meis bazegner d'eir'ün paur, incas
meis bap es sülla glüna e ma mamm'es sü Muntatsch
d'ingionder voust ch'eu sa quai