Siglir tar il cuntegn

Header

cuntegn

16avel Top Pop Rumantsch Not Yet cun «Bandunau»

16. Top Pop Rumantsch cun Not Yet e la chanzun «Bandunau».

Not Yet

En las classas da musica a la scola media a Cuira èn ellas s'entupadas l'emprima giada, Simona Caminada da Castrisch e Claudia Lombris da Schluein, domaduas grondas amaturas dal chant modern. A la finiziun da matura l'onn 2005 han ellas intunà cun grond gust ensemen in'atgna chanzun. Cur che Simona ha tschertgà trais onns pli tard ina vusch accumpagnanta per in concert ad hoc a Glion, ha ella sa regurdà da Claudia. Il giavisch da cuntinuar a chantar ensemen e furmar ina gruppa è uss daventà concret; sco emprim accumpagnader han las duas studentas sursilvanas chattà il multi instrumentalist Lorenz Aenis da Basilea. Ed in num per il project è er gia stà pront - Not Yet («betg anc»). Impurtant saja che mintgina persuna dal trio possia realisar sias atgnas ideas musicalas, punctueschan Simona e Claudia.

La chanzun dal 16avel Top Pop Rumantsch è vegnida scritta da Claudia Lombris; i sa tracta d'ina melodia inspirada d'ina cesura en sia vita persunala, il titel tradescha gia bler: «Bandunau». Quasi in eco lontan a la chanzun che Simona Caminada ha gì interpretà avant trais onns sco Top Pop («Tuorna») – la famusa retscha dal Radio Rumantsch mussa damai cuntinuitad!

Realisaziun:

Musica e text: Claudia Lombris

Producziun: Manfred Zazzi

Battaria: Muso Stamm

Bass: Danny Hertach

Ghitarras: Jean-Pierre Von Dach

Gìa: Maddy

Cello: Lorenz Aenis

Text da la chanzun: Bandunau

Il temps che va

mo ils patratgs sai buc schar dar

els restan piars

sai, vi e less buc crer

ti eis naven

uss fa ei buc pli senn

gie schi bandunau

mintga soli di finescha en in gri

gie aunc ussa sei buc da capir

la veta ha surpriu sia atgna direcziun

per far midadas dat ei buc caschun

il temps el va

jeu vegnel ad emblidar

bia ga less schar dar

mo tuttina nuot che va

ti eis naven

uss fa ei buc pli senn

gie schi bandunau

mintga soli di finescha en in gri

gie aunc ussa sei buc da capir

la veta ha surpriu sia atgna direcziun

per far midadas dat ei buc caschun

finalmein schar star il vargau

buc setener vid quei ch'ei gia stau

nuot ei pli sco quei ch'igl ei stau

empruar da prender cumiau

mitga soli di finescha en in surrir

gie aunc ussa sei buc da capir

la veta ha surpriu sia atgna direcziun

per far midadas dat ei bia caschun

Artitgels legids il pli savens