Siglir tar il cuntegn

Header

cuntegn

18avel Top Pop Rumantsch Casper Nicca & The Heavy Tools cun «Plievgia tgòlda»

18. Top Pop Rumantsch cun Casper Nicca & The Heavy Tools e la chanzun «Plievgia tgòlda».

The Heavy Tools (Casper Nicca, Patrizia Caviezel e René Zimmermann )

La musica era per Casper Nicca gia adina in pau en l'aria - ils onns '80 passava quella cun las undas dal famus Radio 24 tras la Val Schons. Ed in bel di han ils tuns tschiffà il giuvenot ed al purtà or per il mund enturn. Magari a sunar in pau saxofon en ina banda da la Bassa. Ditg suenter il return ha Casper scuvert la ghitarra. E cun quella la vigur dals lungs artgs musicals a la moda da Neil Young u Van Morrison. Impurtanta saja però l'entira band Heavy Tools ch'ha accumpagnà quella nova partenza, accentuescha Nicca: René Zimmermann al bass e Patrizia Caviezel a la battaria - els fan la punt als tuns pli moderns. Betg uschè simpel saja stà da chattar la buna lingua per chantar en rumantsch, damai che ses sutsilvan na saja betg il pli «schuber», conceda il nov rockadur. Tuttina ha el entupà ina bella «plievgia tgòlda» da stad, ch'exprima la ballabaina «tranter inamurar e bandunar, tranter sgular ed ir a pe.» En ina chanzun simpla ed uregliabla che marca oramai il 18avel Top Pop - exclusiv sin Radio Rumantsch.

Casper Nicca è naschì il 1968 a Donat en Val Schons. Suenter studis da scolast ed in segiurn en America ha el manà onns or in affar da musicalias a Winterthur. Turnà en Schons ha el lavurà in curt temp tar il Radio Rumantsch, oz è el maina fatschenta da l'associaziun regioViamala. Patrizia Caviezel e René Zimmermann, ch'èn 10 onns pli giuvens, ha Nicca entupà en Val Schons, ella sco anteriura pura da Donat, el propi sco lavurer lainari. Ensemen furman els dapi 2008 il trio Heavy Tools.

Realisaziun

Text e musica: Casper Nicca

The Heavy Tools

Vusch e ghitarra: Casper Nicca

Bass: René Zimmermann

Battaria: Patrizia Caviezel

Registraziun & producziun: Manfred Zazzi, Apart Turitg

Text da la chanzun: Plievgia tgòlda

Plievgia tgolda segl catram

Fread da stad, utscheals sgolan

Tei a jou nagn tras daguts

Cragn bletschs, egal, fa nut

Nagn sur la veia vei

Glieud cun spiegels da sulegl

Tignas igl meas màn

Plàn, me plàn.

Nus eassan las alas - blau e igl tschiel

Nus eassan las alas - blau e igl tschiel

Sasagn segl mir a la riva

Vagn igl horizont an mira

Unfants fan ir egn pedalo

La plievgi'â gea da gitg calo

Da lientsch digl parc egn saxophon

Velos passan egn buab fa tum

Earvas igls teas tgavels

Prendas or dus mels

Nus eassan las alas - blau e igl tschiel

Nus eassan las alas - blau e igl tschiel

Sgulagn antochen lientsch seigl agl tschiel e vurdagn giou

Vazagn scogl mund va, va..., vazagn scogl mund va

Igl sulegl va ad e davent

Igl teas fread e igl cugl vent

Igl lai fa undetas verdas

Mordas sen tias lefzas

Bagliafas, gis, pleds

Nivels ners utscheals mets

Raquentas da l'oter

Mir fred, utscheals agl cloter

Nus eassan las alas - blau e igl tschiel

Nus eassan las alas - blau e igl tschiel

Sgulagn antochen lientsch seigl agl tschiel e vurdagn giou

Vazagn scogl mund va, va..., vazagn scogl mund va

Sgulagn antochen lientsch seigl agl tschiel e vurdagn giou

Vazagn scogl mund va, va..., vazagn scogl mund va

Artitgels legids il pli savens