Per survantscher l’encreschadetgna ha Lisa Dermont scrit in pitschen imni a la Surselva - en China. Il pli nov Top Pop Rumantsch.
Lisa Dermont
Il Top Pop numer 34 vegn da la China. Co quai? Lisa Dermont, studentessa da sinologia ed oriunda da Rueun, ha passentà trais semesters da stgomi a Bejing ed a Kunming. In bel di l’ha in’amia regalà in’ukulela. Ella ch‘aveva studegià chant classic durant il gimnasi a Cuira ha sinquai scuvert in’avaina ligera en sasezza.
Damai ch’ella laschava encrescher per la Surselva, ha Lisa cumenzà a scriver ina chanzun, plegond quella enturn ils emprims quatter accords emprendids. Ina chanzun che celebrescha las quatter stagiuns e la bellezza da la cuntrada alpina. Agiuntond cun il temp anc autras atgnas chanzuns - perfin da quellas chinaisas - ha Lisa Dermont sviluppà in program concertant, ch’ella ha lura preschentà tar differentas occasiuns: en bars, tar nozzas e sin festivals da strada. Quai per il gaudi dal public chinais.
Turnada en patria ha Lisa proponì la chanzun «Surselva» al team dal Top Pop. Producent Manfred Zazzi e ses musicists han mantegnì la tempra oriunda e rinforzà l’aria da «global pop» à la Manu Chao. Ed uss avain nus il gaudi cun questa frestga melodia che gira tras las undas dal Radio Rumantsch, schend. "Ir sai jeu adina, mo lu è turnar!"
Realisaziun
Text, musica e chant: Lisa Dermont
Producziun: Manfred Zazzi
Bass: Lucas Schwarz
Ghitarra: Jean-Pierre von Dach
Text da la chanzun: Surselva
Jeu sun dalla Surselva
E leu vi jeu restar
Ir sai jeu adina
Mo lu è turnar
Il gi ch’ei neiva,
cufl’ e bisch e fa
Il gi ch’ei neiva
eis ei temps da turnar
La primavera tut che verdeghescha
Il pastg che crescha
Ils utschals a cantar audas
Ed ils radis caulds gaudas.
La stad mondel jeu a cuolm
Sperta sco in camutsch
La bassa ei sco in fuorn
Vaiel jeu cauld segliel en in dutg.
O ti atun plein colurs
Feglia per tiara
Ed il vent lez fa ramurs
Sguscha culla feglia biara.
Mo uss’ schi lunsch naven
Stoi jeu uss star
E sai bu cu jeu poss turnar
Tiels mes tiels mes a casa
Tiels mes tiels mes a casa
Igl unviern miu temps preferiu
Sin pista cun skis
Sur mintga biet vegn ei segliu
Gie da quei vegnas mai unfis.