Siglir tar il cuntegn

Header

cuntegn

39avel Top Pop Rumantsch Katja Wolf e Marius Deflorin cun «Igl ei sco igl ei»

39. Top Pop Rumantsch cun Katja Wolf e Marius Deflorin e la chanzun «Igl ei sco igl ei (That’s The Way It Is)». Glindesdi, ils 01-06 vegn il Top Pop preschentà tranter las 06.00 e las 09.00 al Radio Rumantsch.

Katja Wolf e Marius Deflorin

Marius e Katja lavuran en la medema fatschenta da producziun e publicitad a Turitg. Ed in bel di scuvran els tschertas cuminanzas frappantas. La derivanza sursilvana. La passiun per il chant. E lura anc in detagl sin ina veglia fotografia da famiglia: lur dus tats che gievan a pestga ensemen en il Rain Anteriur. Tut quellas coincidenzas pretendan directamain ina cuntinuaziun. Per exempel en furma d'in Top Pop Rumantsch cuminaivel. Katja Wolf e Marius Deflorin! Tant pli ch'els èn tut auter che principiants. Katja, ch'è creschida si a Trun ed ha frequentà ina scolaziun da vusch classica, ha chantà onns or en pliras gruppas da funk, jazz e hiphop - emprestond schizunt in pèr tuns exquisits a las Liricas analas. Marius, ch'è creschì si en la Bassa, ma chapescha perfetgamain rumantsch, ha era gia diversas staziuns da soul e rock davos sai e chanta dapi in pèr onns cun vusch voluminusa en lezza band che porta il num ed il bul dal bab prominent: l_mar.

Realisaziun

Il text da la chanzun han Katja e Marius gist furnì sezs, tematisond il stgars temp ch'als resta ozendi per talas aventuras. Ed ussa chantani ensemen, sur in bel riff da funk concepì en il studio Aquarium, en duas linguas: «Igl ei sco igl ei (That's The Way It Is)», accumpagnads d'in curt intervent da SNOOK, il rappunz ladin. In duo, anzi, in trio vairamain straordinari.

Text: Katja Wolf, Marius Deflorin, Lucas Schwarz

Rap: SNOOK

Bass: Lucas Schwarz

Ghitarra: Dominik Eberle

Producziun: Manfred Zazzi

Text da la chanzun: «Igl ei sco igl ei (That’s The Way It Is)»

Nua resta miu temps?

Eis ei gia schi tard?

Nua resta miu temps?

Cu vegn miu part?

Tut va aschi spert oz

Pos gnanc suenter pli

Nua resta miu temps?

Sas ti dir quei a mi?

That’s the way it is – Igl ei sco igl ei

(And that is fine with me)

In auter liug – in auter di

Tut va giu e tut va si

Vai temps per quei e temps per tschei

resta mo buc temps per mei

Tuts cargan giu siu shit mei

Ei quei lu gest damond jeu tei?

Ed jeu emprovel da gidar

Di a mi tgei duei jeu far?

That’s the way it is – Igl ei sco igl ei

(And that is fine with me)

Tuttina lessel mai brattar

E perquei miu style da veta mai midar

Sesentel bein grad sco jeu sun

Mondel fresh atras il mund

E tut emporta nuot perquei ch’igl ei – igl ei sco igl ei

audio
Tadlar «Igl ei sco igl ei (That’s The Way It Is)»
ord RTR Audio dals 01.06.2015.
laschar ir. Durada: 3 minutas 1 Secunda.

Artitgels legids il pli savens