Siglir tar il cuntegn

Top Pop Rumantsch 44avel Top Pop Rumantsch – Lioms dapi l’uffanza

Suenter ina lunga pausa creativa turna la retscha da Top Pop Rumantsch da RTR cun sia 44avla ediziun: Il duo sursilvan D’n’S chanta «Grazia».

Legenda: Guardar il video «44avel Top Pop Rumantsch - Tgi èn Debora e Sina?». Durada 1:47 minutas.
Dals 11.11.2017.

Debora Lutz da Glion e Sina Halter da Surcuolm sa conuschan gia dapi passa set onns: S’entupadas èn ellas a chaschun da lur participaziun al musical «High School» a Glion.

En lur nova chanzun autobiografica «Grazia» laschan ellas flurir lur amicizia gia durant l’uffanza, «ensemen far musica ha nus ligiau» di ina lingia. La melodia dal toc, cumponida d’in lavuratori american, fa propi allegras cupitgolas, e las duas vuschs èn purtadas da tempras zunt finas. Vuschs che tiran endament la chanson innocenta franzosa.

Bandunà la Surselva vers Turitg per studegiar

En vardad han Debora e Sina, ubain D’n’S, sco ch’ellas sa numnan en art, gia daditg bandunà la tgina materna. L’ina studegia psicologia a Turitg, l’autra linguistica a Winterthur. Ensemen partan ellas in’abitaziun en las vischinanzas. Tranteren chattan ellas anc peda per pitschnas cumparsas concertantas, accumpagnadas da clavazin e ghitarra. Là interpreteschan ellas inquala represa, ma surtut atgnas chanzuns che tunan magari in zic pli melanconicas che quest Top Pop zunt legraivel. Duas soras en musica, e quai «dapi gl’emprem mument», sco l’entschatta da la chanzun di.

Grazia

Dapi gl’emprem mument
che nus vein sentupau
eran nus aunc affons
plein legria
ensemen far musica
ha nus ligiau

Sche jeu sai bu vinavon
gida tiu plaid
cun tei ha’ns mai lungurus
viu ina massa
ha nus ligiau

Sun leda per tut quei
che ti fas per mei
igl ei adina bi
quei temps cun tei
discuors profunds
emblidins mai

Tut quei ch’jeu ditgel a ti
tegnas ti per tei
bia vein nus fatg atras
teniu ensemen
ha nus ligiau

Ti eis per mei
sc’ina sora
metta avon pli tard
aunc adina mo nus duas
Ti eis per mei
sc’ina sora