Siglir tar il cuntegn

Header

Navigaziun

Portrait da Benedetto Vigne e Paulin Nuotclà.
Legenda: Da sanester: Benedetto Vigne e Paulin Nuotclà. G. Klainguti
cuntegn

Top Pop Rumantsch Top Pop Rumantsch cun Benedetto Vigne e Paulin Nuotclà

26. Top Pop Rumantsch cun Benedetto Vigne e Paulin Nuotclà e la chanzun «Trubadur».

Suenter la girlgroup spontana P.I.A., las pli giuvnas interpretas d’in Top Pop Rumantsch, vegnan ussa ils chantauturs-tats. Ils trubadurs Benedetto Vigne e Paulin Nuotclà festiveschan omadus quest onn lur 60avel anniversari.

La chanzun ha Benedetto Vigne scrit: ina melodia simpla en il stil quasi western cun finas allusiuns a gronds classichers sco «Lola» dals Kinks u «Good Vibrations» dals Beach Boys. Il text guarda enavos sin la carriera dals dus chantauturs, quai cun in surrir sin bucca: trubadur da num, ti palaisas dal passà, trubadur da pum, ti manchentas il martgà.

Benedetto Vigne e Paulin Nuotclà

Omadus chantauturs han cumenzà lur carrieras avant passa 40 onns, omadus han publitgà la fin dals onns 70 lur emprims portatuns: Paulin Nuotclà ses «Che fain oz?» e Benedetto Vigne sias «Carezzas» cun Benni & Others. Omadus èn adina puspè sa preschentads sin tribuna ed han publitgà chanzuns ed albums. Paulin è sa deditgà ils ultims onns pli intensivamain als sgrafits en l'Engiadina, entant che Benedetto ha intensivà la lavur da translatar chanzuns. Cun «Lain fabular - ils Beatles per rumantsch» ha el realisà in grond e bel project.

Eu giaiv’ün zich pel muond intuorn, ‘na tscherta buscha sül givè, ‘na gitarra nauscha suot il bratsch, cul tren, per stop ed eir a pè, uschia l’emprima strofa dal novischem Top Pop Rumantsch, il medem mument in omagi e revista. Benedetto Vigne e Paulin Nuotclà èn ils dus chantauturs ch’han creà e sviluppà ina schientscha per la chanzun da rock e pop en rumantsch.

Realisaziun

Chant: Benedetto Vigne e Paulin Nuotclà
Ghitarra: Jean-Pierre von Dach
Bass: Dany Hertach
Battaria: Muso Stamm
Chor: Madeleine Raschèr
Cumposiziun: Benedetto Vigne
Text: Benedetto Vigne e Paulin Nuotclà
Producziun: Manfred Zazzi

Text da la chanzun: Trubadur

eu giaiv’ ün zich pel muond intuorn
’na tscherta buscha sül givè
’na gitarra nauscha suot il bratsch
cul tren, per stop ed eir a pè

i' gieva cun igl satgados
la ghitarra cotschna sen givi
cantava cun na vocsch da rom
digls tgangs da barba gianandri
da glioirs ed er da preditgants
en stavel d'animals
e tot igls giouens da la val
'na canorta bel anturn igl fi

trubadur da num
ti palaisas dal passà
trubadur da pum
ti manchentas il martgà

sül palc mandura da rebel
chavels nairs fin circa gio pro’l schnuogl
a chantar sü la mort dal non
sainza resguard sün chenin ravuogl
munaida d’eira rarità
importeiva zuond pac in fuond
in vist’a la necessità
d’urgiaintamaing müdar il muond

trubadur da num
ti palaisas dal passà
trubadur da pum
ti manchentas il martgà

i' gieva se pigl microfon
na pigüra scu d'en spivintegl
cantava sur digl mond balurd
e mintgatant er digl smarvegl
i' gieva alloura translatond
igls gronds ed anc pi gronds
co stung e vard oz anavos
e crei betg ple igl mez da chegl

trubadur da num
ti palaisas dal passà

nua stas
cura vas
e tge fas
trubadur
trubadur

trubadur da num
ti palaisas dal passà