Top Pop Rumantsch cun Martina Linn

Il 43avel Top Pop Rumantsch porta il titel «Leder fin» e vegn interpretà da la chantautura engiadinaisa Martina Linn.

Martina Linn cun sia band en in sutpassadi Bild in Lightbox öffnen.

Legenda da maletgs: Martina Linn cun sia band. MAD

La vusch dal 43avel Top Pop Rumantsch tutga questa giada a Martina Linn, la giuvna chantautura da La Punt.

Bab dal Tirol dal Sid, mamma da Berna

Martina Linn, ch’è creschida si en ina famiglia betg rumantscha – cun in bab sidtirolais ed ina mamma bernaisa – ha lantschà avant trais onns ina carriera nunditga, chantond agens songs per englais. Bainspert ha ella pudì fitgar pe en la scena naziunala, sa confermond l’onn 2015 cun ses segund album «Pocket Of Feelings».

Il rumantsch n'è dentant betg ester per Martina Linn. Anzi, sin via ed en scola ha ella emprendì la lingua indigena, serrond giu la finala il gimnasi cun ina matura bilingua a Samedan.

Agid da Curdin Nicolay

Ma per scriver agens texts rumantschs na sa senta la chantautura, che stat actualmain avant finir ses master a la scola da jazz a Lucerna, betg anc segira avunda. E perquai ha ella surlaschà ils pleds da ses Top Pop Rumantsch al collega ed ami trubadur Curdin Nicolay ch’ha concepì per ella l’istorgia dal «Leder fin», in brigant in pau caotic ed indecis.

«Ina figura che sa cunfa bain cun mai», declera la chantautura, suttastritgond il grond plaschair ch’ella ha da far questa premiera rumantscha – ina chanzun cun in bel trantertun da folk modern.