Siglir tar il cuntegn
Inhalt

Top Pop Rumantsch Top Pop Rumantsch cun Mattiu Defuns

40. Top Pop Rumantsch cun Mattiu Defuns e la chanzun «Mia olma». La premiera dal Top Pop Rumantsch ha lieu ils 17 da settember 2015 tranter las 07:00 – 08:00 sin las undas da Radio Rumantsch. Tranter las 11:00 – 12:00 è Mattiu Defuns live en il studio

Mattiu Defuns.
Legenda: Mattiu Defuns. MAD

Mattiu Defuns

Sia vusch ha ina bella patina da blues e soul, ina vaira natira da rockadur schess ins, schebain ch’ il chantadur ha mo 17 onns, in record per in Top Pop Rumantsch. E tuttina, Mattiu Defuns da Trun-Darvella ha gia experientschas cun registraziuns professiunalas. La primavaira passada ha el briglià en il duet «Jeu engolel tiu cor» cun il rappunz sursilvan Giganto. E Mattiu è gia dà en egl sin inqual festa cun in agen bel repertori inspirà da la musica da Bob Marley.

Il plaschair da la musica ha el survegnì da chasa - ses bab Gioni è stà in dals Furbazs originals - ma la vaira passiun è vegnida cun scriver atgnas chanzuns durant frequentar la Scola da talents a Glion. Dacurt ha Mattiu Defuns finì il curs preliminar da la scola d’art Liechtenstein e lavura ussa sco manual. Ma sia finamira è la scola da musica. Qua sa cunfa il titel da ses Top Pop bain, ina melodia simpla ma impressiunanta, ch’exprima la singularitad da «Mia olma», da sia «soul» pia. D’udir exclusivamain sin Radio Rumantsch.

Musica e text: Mattiu Defuns
Battaria: Roger Hintermann
Bass: Lucas Schwarz
Ghitarra: Jean-Pierre von Dach
Producziun: Manfred Zazzi e Roland Vögtli

Mia olma

Ed jeu sun jeu,
E ti, ti eis ti
Mia olma sauda a mi e tia a ti.

Fussel bu jeu sche mia olma fuss bu la mia.
Fussel bu cheu sche mia olma fuss bu aschia.

Fussen mai cheu.
Fussen mai cheu.
Fussen mai cheu, sin quest mund aschia.

Ed jeu sun jeu, e ti, ti eis ti
e quei ei mia fatscha la notg sco il di.

Ed jeu sun cheu per quest mument,
ed ensessez han ins aunc bia ensenn.

Fussen mai cheu.
Fussen mai cheu.
Fussen mai cheu, sin quest mund aschia.