Il toc duai esser in agid per detabuisar la mort.
Ils dus acturs Sara Francesca Hermann e Roberto Chiriatti han ensemen cun la reschissura Silvana Gargiulo scrit ed inscenà il toc «Réception 3», ina tragedia curiusa. Els mussan tragicomic lur atgna interpretaziun dal misteri da vita e mort.
A la recepziun 3 passan las olmas cura ch'ellas èn mortas. Ellas vegnan retschavidas là. Fra è gist morta. L'emprim sto ella acceptar quai e nua ch'ella è. E lura sto ella emprender tge ch'ella ha da far en la recepziun 3.
Quai è in smaledì sbagl!
Las circumstanzas da purtar in toc da teater sin tribuna n'èn il mument betg simplas. La finanziaziun saja in tema, di Sara Francesca Hermann ch'ha decis da far sezza la producziun da la tragedia curiusa «Réception 3».
Jau na sun betg vegnida da rimnar tut ils raps per la producziun.
Ella haja survegnì bler sustegn dal chantun Grischun e da fundaziuns. Ma tuttina na basti betg. Corona ha anc adina in’influenza sin manaschis da teater. Lez èn anc adina vi da pussibilitar producziuns ch’èn vegnidas spustadas pervia da corona.
Ma la finamira il mument è da giugar, dad ir sin tribuna, di Sara Francesca Hermann suenter ina da las davosas emprovas avant la premiera.
