Siglir tar il cuntegn

True crime Tranter fascinaziun e critica

Films, cudeschs u podcast da True Crime èn populars. Il genre da raquintar crimis ch’èn propi capitads vegn consumà da bleras persunas. Daco che quai è uschia, respunda il scienzià da litteratura da crimis Manuel Bauer. El dat invista en ils mecanissems e las problematicas da quest fenomen.

Il fenomen da «True Crime»: Fascinaziun e critica

Il True Crime è ina maschaida da crimi, thriller psicologic, horror e documentaziun. La maschaida da differents geners pudess esser ina part dal success dal format, di Manuel Bauer. Era empermetta il True Crime invistas en ina «realitad pli profunda» ed en ils lieus ils pli stgirs da l’umanitad. Per l’autra attira il True Crime era cun la perspectiva da chapir e declerar delicts. Dentant qua datti era in privel, numnadamain che chaussas vegnan simplifitgadas. La realitad saja dentant savens pli cumplitgada.

Plinavant fa el attent che il «True Crime» producescha ina versiun da la «vardad» tras la selecziun ed arranschament dals auturs. El pledentescha per ina reflexiun critica da l'agen consum da True Crime, surtut en cas pli actuals, nua ch'ina pussaivla retraumatisaziun da victimas e parents pudess esser il cas.

Malgrà sia sceptica fa Bauer attent ch'i dependa adina era, co che l’istorgia vegn raquintada. A la fin porscha il gener betg mo divertiment, mabain era chaschun per ina reflexiun davart dumondas socialas e moralas.

Manuel Bauer

Avrir la box Serrar la box

Manuel Bauer è expert per litteratura da crimi ed ha analisà quella en in cudesch ch’el ha publitgà avant curt. Sias analisas mussan che l’interess da l’uman per la sgarschur n’è betg in nov fenomen. La fascinaziun per delicts e mazzaments sa laschia persequitar fin en l'antica.

Il pli nov cas da True Crime Grischun

L’um da fatschenta da San Murezzan Martin Staub (50) vegn chattà ils 30 da settember 2003 en in lai da sang sin ses bain d’allevar chavals a la Côte d’Azur. Sco ch’i para è el vegnì assassinà là en sia chasa a moda brutala, durant ch’insatgi è rut en. En il rom da las inquisiziuns chatta la polizia dentant indizis ch’insatgi haja planisà il murdraretsch. Las retschertgas mussan che perditgas n’han betg ditg la vardad ed alibis èn vegnids inventads.

Per la famiglia è il murdraretsch stà in schoc. I saja stà in temp difficil. Il figl da la victima, Silvio Staub, ha discurrì cun nus sur dal crim sgarschaivel, e co che la famiglia va enturn cun il capità.

Igl è l’emprima giada che Silvio Staub discurra cun las medias sur dal murdraretsch da ses bab avant passa 20 onns. Per el èsi impurtant ch’il cas na va betg en emblidanza. En memoria a ses bab ha el vulì discurrer dal crim ch’è restà ad el en memoria sco sch'i fiss stà ier.

Las episodas pudais vus tadlar qua:

Nus vulain raquintar dapli cas criminals grischuns

Sa regurdais Vus dad in cas criminal tar Vus en la val? Datti istorgias cun energia criminala che Vus tadlassas gugent ina giada raquintadas dal fund ensi, inclusivamain in'egliada en las actas ed in sguard sur il lieu da delict ora?

Lura annunziai voss cas – era pussaivel anonimamain – e forsa vegn quel lura lavurà si en il podcast True Crime Grischun.

Dapli episodas da True Crime:

RTR True crime

Artitgels legids il pli savens