Las plaivs en Svizra na fan strusch pli la confessiun classica en il confessiunal. Anc radund in terz da las plaivs fan la confessiun singula. En ils blers cas tschernan ils spirituals dentant autras furmas e vias da s'avischinar al tema cun uffants. Il plevon da las Plaivs da Glion, Sagogn, Schluein e Sevgein, Alfred Cavelti, fa dapi blers onns in ritual cun il num «la via da la reconciliaziun».
Ils uffants duessan daventar conscients che nus cartain en in Dieu ch’è bun e misericordaivel, e betg in Dieu che fa tema.
Era l'uvestg da Cuira Joseph Maria Bonnemain è in aderent da quai ch'uffants possian reflectar lur agir senza sforz empè da confessar lur putgads a moda classica. L'uvestg ha per exempel celebrà ina «devoziun da penetienza» cun uffants.
I dat ina moda da reflexiun e d’urar en cuminanza en baselgia e la finala in discurs voluntar sut quatter egls.
En tuts dus cas stat la reflexiun da l'agen agir ed in Dieu buntadaivel en il center. Ils uffants emprendan a moda chapaivla tge che culpa e pardun muntan.
