Las veglias scarsolas ch'eran vegnidas fabritgadas a posta per la schlitteda dateschan per part dal 18avel tschientaner. Per regla vegn la schlitteda organisada da la giuventetgna dal vitg. La sort decida ils pèrins per la schlitteda.
Las dunnas s'occupan da la decoraziun da la scarsola e dal chaval. Il di da la schlitteda, normalmain ina dumengia sa vestgeschan dunnas ed umens en costum engiadinais. La pareta bella e festiva è in element central da la Schlitteda. Sa vestgir bain en costum dovra temp.
La schlittunza sesa persula sin il sez, il chavalier prenda plaz davostiers sin il buc. Las scarsolas sa ferman en ils proxims vitgs, là vegn bavì vin chaud. Gentar datti a la fin dal traject avant che sa volver e turnar enavos. La tradiziun prevesa ch'il giuven envida la saira la giuvna a tschaina. Ozendi fan part era maridads ed uffants, ed i finescha cun ina festa communabla cun trais-cha – in saut.
Da chattar ozendi chavals per far la schlitteda è difficil, er il rumir naiv per questa occasiun n'è betg ideal. Sco ch'i para è il plaschair da quest usit anc adina uschè grond ch'el exista vinavant e quai betg be sco attracziun turistica. L'usit è preschent oravant tut a Puntraschigna, Champfér, San Murezzan e Samedan – mo er en l'Engiadina Bassa.