Las plaivs da la Surselva sentian ch'i dettia ozendi mo paucas persunas che sunan orgla, di Albert Spescha, l'anteriur president da l'uniun d'organists da la Surselva. Oravant tut en la Lumnezia saja la mancanza fitg acuta. Ord quest motiv ha Marco Sgier, ils president da la plaiv Lumnezia Miez, discutà quella sfida cun la suprastanza e chattà ina soluziun en furma d'in pitschen apparat cun il num «MIDI-Recorder».
L'organista po registrar ils tocs, il plevon po lura metter en il stick avant la messa ed uschia davent da l'altar smatgar sin in buttun e lura vegn quest toc sunà «live» e betg mo ord ina boxa.
L'organista u l'organist po cun agid dal «MIDI-Recorder» registrar ils tocs sin in stick USB e dar quel suenter al plevon cura ch'ella na po ina giada betg esser preschenta ad ina messa. Quest stick USB sto il plevon lura metter en l'apparat dal «MIDI-Recorder» che stat gist sur la claviatura da l'orgla. Cun agid d'in telecumond po il plevon alura smatgar sin in buttun e laschar sunar l'orgla. Tenor Marco Sgier n'aud'ins betg che l'organista na sesa betg sin la lautga.
-
Bild 1 von 4. L'orgla da Son Vintschegn ha survegnì l'onn 2022 in sustegn tecnologic. Bildquelle: RTR.
-
Bild 2 von 4. Il «MIDI-Recorder» cun in stick USB ed in telecumond per ch'il plevon possia laschar sunar l'orgla davent da l'altar. Bildquelle: RTR.
-
Bild 3 von 4. L'orgla da Son Vintschegn vegn regulada electric-pneumatic: Ils tschivlots survegnan in impuls electric. Bildquelle: RTR.
-
Bild 4 von 4. Davos ina paraid da lain sa chatta l'entira electronica. Bildquelle: RTR.
Cun agid da quella innovaziun tecnologica èsi pussaivel dad era laschar sunar l'orgla durant sepulturas che han savens lieu durant l'emna e cura che bleras organistas ed organists na pon betg esser preschents en baselgia. Quai saja tenor Marco Sgier in grond avantatg damai che la messa saja entras quai pli empernaivla e pli digna.
Sche nus avain sepulturas per exempel durant l'emna e l'organista na po lura betg esser qua, lura èsi schon pli dign sch'ins po laschar sunar quels tocs da l'orgla.
Quella soluziun tecnologica ch'ils responsabels han integrà en l'orgla da Son Vintschegn n'è dentant betg in recept per tuttas baselgias ch'han miserias da chattar organistas ed organists. L'orgla sto numnadamain esser regulada electric-pneumatic, ils tschivlots pia survegnir in impuls electric. Insatge ch'è plitost l'excepziun en las baselgias Lumnezianas. La gronda part vegnia tenor Marco Sgier dirigida mecanicamain.