Jau, Florian Zutt enconusch Nino dapi passa 20 onns, dapi ch'el era in pitschen mat cun chavels blonds clers. Meglier, dapi ch'jau hai realisà cun el las emprimas reportaschas per il Sportpanorama e pli tard per la Sportlounge.
Durant ina da nossas emprimas scuntradas è el vegnì selecziunà per ils gieus olimpics a Peking enstagl dal bler pli renumà Ralph Näf e pauc pli tard gudogna el cool sia emprima medaglia olimpica. In'autra giada fa el tut per il success per gudagnar aur a Londra, ma cupitga dramaticamain. Sco commentatur live da quel temp, poss jau strusch crair, sco er millis dad aspectaturs ed aspectaturas, co l'adversari Jaroslav Kulhavy al surpassa anc en l'ultim mument. Ma Nino resta persistent, gudogna aur 4 onns pli tard e daventa bainprest il pli grond da ses sport insumma.
Era perquai ch'ina chaussa al distingua sur ils onns: El na surlascha nagut a la casualitad. Schurter è in perfecziunist che porta cun sai sper bler talent era la morala da lavur necessaria.
En ses ultim onn, igl è in revair suenter in temp pli lung, n'ha quai betg midà. Igl è bel da puspè lavurar ensemen per quest film. Bler è famigliar e la professiunalitad gist uschè gronda sco pli baud. E tuttina è insatge auter questa giada. Terminar sia carriera è incalculabel per Nino. Renunziar a quai ch'el ha fatg il pli gugent durant onns. Quai è grev ed el ha sutvalità quai. Il perfecziunist Schurter, surdumandà da las emoziuns. El, il crack, emprenda en la vegliadetgna «auta» da sport da bunamain 40 onns da lubir emoziuns durant la concurrenza e po tuttina giudair la fin. Uschè schluccà n'hai jau mai vis Nino en tut quels onns!