Sch’ins vul savair co ch’i va propi cun uffants e giuvenils en temps da pandemia han ins da dumandar ad ellas – las persunas, che lavuran tar il 147. Il 147 è il clom d’agid e sustegn per uffants e giuvenils. Tar il 147 datti 24 uras al di in’ureglia averta. Per ils problems pitschens, ma er per ils problems gronds e perfin ils problems grondischems.
40% dapli discurs e chats pervi da suicidi
Cun problems grondischems èn ils profis dal 147 confruntads regularmain. 7 uffants u giuvenils da 700 enfin 800, che s’annunzian di per di, s’annunzian cun patratgs da suicidi. Quai èn bod dubel tants che avant la pandemia, raquinta Lulzana Musliu.
Tar la Pro Juventute, la fundaziun purtadra dal 147, è ella responsabla per las medias. Il november passà aveva alarmà il 147 cun questas cifras. Las cifras actualas n’haja ella anc betg, di Lulzana Musliu.
Dentant saja quai ina realitad, che uffants e giuvenils s’annunzian er adina puspè cun plans d’acziun concrets. Radund 100 giadas hajan ilas cussegliadras u ils cussegliaders dal 147 stuì alarmar la polizia u l'ambulanza per ir a gidar concret.
Il 147 sa salvar secrets – tut è anonim e gratuit
Ch’il 147 sa, tgi che cloma per agid è l’excepziun e vegn tematisà mo en cas d’urgenza. Uschiglio è tut il contact cul numer d’agid anonim, confidenzial e gratuit. Perquai, raquinta Lulzana Musliu, na hajan els n’er betg statisticas, da tgi che telefonescha u tge che succeda suenter il contact cun ils uffants u giuvenils.
Grazia a las medias socialas detta tuttina adina puspè in resun u l’auter – ed in grazia fitg cun notà «Vus avais salvà mai!»