Las duas preditgantas han fatg lur pregias sin basa dal raquint biblic dal cumbat da Jacob cun Dieu (Genesis 32, 23-33). Var 200 persunas èn stadas preschentas al cult divin rumantsch en la baselgia Son Peder a Turitg a chaschun da la festa da rogaziun federala. Igl è stà ina raspada da refurmads ed era da catolicas, Rumantschs e Rumantschas che vivan a Turitg, dentant era da varsaquantas persunas da lingua tudestga. Enramà è la celebraziun vegnida da chanzuns tradiziunalas rumantschas, chantadas dal Chor maschadà grischun da Turitg sut la batgetta da Remo Weishaupt. In barat animà hai dà suenter il cult divin a l'aperitiv cun maluns e buglia da maila sin la plazza davant baselgia.
Il cult divin è stà bellischem. Ins aveva propi l'impressiun che tuts e tuttas en questa baselgia enclegian nossa lingua. Quai è ina furma dad unitad ed identitad.
En l’istorgia biblica, ch’è stada en il center dal cult divin, sto Jacob cumbatter in grev cumbat sin ses viadi a chasa suenter ch’el era stà sin la fugia durant onns. Cun la victoria obtegna Jacob ina nova identitad. Mo uschia sa el sa statgar da ses passà sco engianader e returnar a chasa.
Ed uschia sco a Jacob avant bundant 3'500 onns vai era als umans d’ozendi: Els midan lur identitad en il decurs da lur vita. En il coc resta l’identitad dentant insatge stabel, di la psicanaliticra tudestg-svizra Eva Jaeggi. Ultra da l’identitad individuala detti però era pliras identitads collectivas sco l’identitad naziunala, culturala ed etnica.
Jau poss m'identifitgar dal tuttafatg cun la vita a Turitg. E tuttina – la vita en il vitg ha procurà per la profunditad e la vista da l'essenzial.
Cun tge che la raspada en la baselgia da Son Peder s’identifitgescha e cun tge sentiments ch’ella ha experimentà il cult divin rumantsch en il territori linguistic tudestg, da quai rapporta Vita e cretta.
-
Bild 1 von 4. Son Peder, la baselgia cun il pli grond plat da cifras da l'Europa, è stada l'emprima baselgia refurmada da Turitg ed è stà lieu d'occurrenza dal cult divin rumantsch. Bildquelle: RTR, Olivia Spinatsch.
-
Bild 2 von 4. Las duas plevonessas refurmadas Chatrina Gaudenz e Cornelia Camichel Bromeis han creà il cult divin rumantsch communablamain. Bildquelle: RTR, Olivia Spinatsch.
-
Bild 3 von 4. Al cult divin per la festa da rogaziun federala hai era dà ina Sontga Tschaina. Bildquelle: RTR, Olivia Spinatsch.
-
Bild 4 von 4. Varsaquantas persunas han giudì in aperitiv cun gentar sin la St. Peterhofstatt avant la baselgia. Bildquelle: RTR, Olivia Spinatsch.