Ils delegads e las delegadas da las passa 70 baselgias partenarias da l’ovra missiunara evangelic-refurmada «Missiun 21» discutan, debattan e prendan decisiuns a la sinoda da missiun internaziunala a Tavau. E quai è impurtant ed indispensabel en temp actual da guerras e crisas mundialas.
Nus vulain demussar che uschè bler stat en connex sin il mund. Per exempel pertutgant la midada dal clima: Che nus en l'Europa essan era responsabels persuenter da facilitar la vita a tals umans che vivan en regiuns pertutgadas da catastrofas da la natira.
Dapi 200 onns presta «Missiun 21» cooperaziun al svilup, agid d’urgenza e reconstrucziun en l’Africa, l’Asia, l’America Latina ed en l’Europa. Quai cun la finamira da pussibilitar ina vita en dignitad a tut ils umans.
Quai vul dir ch’ils participants e las participantas da la sinoda da missiun han bler da discutar. Ma i vegn er a dar in program accumpagnant varià per tuts e tuttas. A la sinoda da missiun vegn sautà, ins po visitar concerts ed autras preschentaziuns da cultura, sagiar spezialitads culinaricas ord cuschinas da l’entir mund, far part a discussiuns al podium, referats ed a servetschs divins.
Sche umans fan diever dad armas è il dialog internaziunal tant pli impurtant.
Co ch’in tal format po dentant propi gidar da midar il mund e tge sfida che quai munta per la squadra d'organisaziun, da quai raquintan Curdin Mark, il copresident dal comite da patrunadi da la sinoda da missiun e Christoph Rácz da l’ovra missiunara «Missiun 21».