Siglir tar il cuntegn

Header

audio
«En temps da guerra datti savens malsegirezzas»
Or da Vita e cretta dals 28.08.2022.
laschar ir. Durada: 57 minutas 26 Secundas.
cuntegn

Vita e cretta «En temps da guerra datti savens malsegirezzas»

Sche schuldads e schuldatas fan experientschas turmentantas, pon els ed ellas sa drizzar a l’assistenza spirituala da l’Armada svizra. Quai è ussa, en temps da guerra en Europa, pli che mai impurtant.

Clau Martin Bieler (oriund da Rabius) è administratur parochial a Sattel en il chantun Sviz. El ha studegià teologia a Cuira ed a Roma, n’enconuscha dentant betg mo quai che fatschenta ils parochians e las parochianas da Sattel. El sa era, tge che preoccuppa ils schuldads e las schuldatas da l’Armada svizra. Clau Martin Bieler è era chaplon e spiritual militar e procura per la pastoraziun da la schuldada. Plinavant è el schef d’equipa en il «Care Team» da l’Armada svizra, il team che fa pastoraziun d’urgenza.

Jau sun persvadì ch'i dovra adina dapli l’assistenza spirituala entaifer l’Armada svizra.
Autur: Clau Martin Bieler Chapitani, spiritual militar
Clau Martin Bieler tegna ina pregia.
Legenda: Clau Martin Bieler celebrescha ina messa or en il liber ensemen cun la schuldada. MAD

Totalmain 171 spirituals militars sustegnan ils schuldads e las schuldatas svizras, sch’els ed ellas han il cor che strocla. Ils spirituals s’occupan da tut las persunas, tuttina a tge religiun ch’ellas appartegnan. Igl è scumandà da missiunar. Dapi il matg da quest onn lavura era in spiritual cun background muslim en l’armada. Uschia ins reagescha sin la diversitad confessiunala entaifer l’armada. Previs èsi era d’engaschar spirituals d’autras religiuns. Quai en cas ch'i dat problems e dumondas che pertutgan las religiuns specificas.

Ina giada u l'autra datti era muments stentus en l’assistenza spirituala. Dentant èsi per il solit fitg commovent.
Autur: Clau Martin Bieler Chapitani, spiritual militar

Tge tematicas che fatschentan oz spezialmain la schuldada, co che sia atgna religiun gida a Clau Martin Bieler da sustegnair auters e pertge ch'i dovra tenor el adina dapli l’assistenza spirituala entaifer l’armada, quai tradescha el en Vita e cretta.

Clau Martin Bieler en Bosnia.
Legenda: Clau Martin Bieler è engaschà en las scolas d’infantaria a Birmensdorf (ZH), tar la «Swisscoy» en il Cosovo ed era tar la «EUFOR LOT» en Bosnia. MAD
audio
«En temps da guerra datti savens malsegirezzas» – Part 1
ord Vita e cretta dals 28.08.2022.
laschar ir. Durada: 4 minutas 31 Secundas.
audio
«En temps da guerra datti savens malsegirezzas» – Part 2
ord Vita e cretta dals 28.08.2022.
laschar ir. Durada: 6 minutas 7 Secundas.

Vita e cretta 08:00

Artitgels legids il pli savens

Scrollar a sanestra Scrollar a dretga