Clau Martin Bieler (oriund da Rabius) è administratur parochial a Sattel en il chantun Sviz. El ha studegià teologia a Cuira ed a Roma, n’enconuscha dentant betg mo quai che fatschenta ils parochians e las parochianas da Sattel. El sa era, tge che preoccuppa ils schuldads e las schuldatas da l’Armada svizra. Clau Martin Bieler è era chaplon e spiritual militar e procura per la pastoraziun da la schuldada. Plinavant è el schef d’equipa en il «Care Team» da l’Armada svizra, il team che fa pastoraziun d’urgenza.
Jau sun persvadì ch'i dovra adina dapli l’assistenza spirituala entaifer l’Armada svizra.
Totalmain 171 spirituals militars sustegnan ils schuldads e las schuldatas svizras, sch’els ed ellas han il cor che strocla. Ils spirituals s’occupan da tut las persunas, tuttina a tge religiun ch’ellas appartegnan. Igl è scumandà da missiunar. Dapi il matg da quest onn lavura era in spiritual cun background muslim en l’armada. Uschia ins reagescha sin la diversitad confessiunala entaifer l’armada. Previs èsi era d’engaschar spirituals d’autras religiuns. Quai en cas ch'i dat problems e dumondas che pertutgan las religiuns specificas.
Ina giada u l'autra datti era muments stentus en l’assistenza spirituala. Dentant èsi per il solit fitg commovent.
Tge tematicas che fatschentan oz spezialmain la schuldada, co che sia atgna religiun gida a Clau Martin Bieler da sustegnair auters e pertge ch'i dovra tenor el adina dapli l’assistenza spirituala entaifer l’armada, quai tradescha el en Vita e cretta.