Danunder che noss resti deriva e sut tge cundiziuns che quel vegn producì è savens difficil d'eruir. L’etichetta di bain tge fil ch’è vegnì duvrà, en tge terra ch'igl è vegnì producì e co lavar. Ma davart las cundiziuns da producziun taschan las etichettas. Savens na sa gnanc la firma da moda sezza ils detagls.
La firma Grischuna Rotauf empermetta persistenza e dapli transparenza. In factur impurtant è per els da producir tut quai ch'è pussaivel en Svizra.
Nus vulain vegnir sin 100% Swiss made e quai vul dir bajegiar si material ch’i na dat anc betg.
Launa Svizra datti avunda. Ma tar auters materials vegni pli grev. Textilias tecnicas che na lascha atras l’aua na devi avant in pèr onns anc betg en Svizra. In spin-off da l’ETH ha uss dentant cumenzà a producir tala taila.
Duvrar chemicalias, quai na fetschia Rotauf betg, di Curdin Bandli ch’è in dals fundaturs. Producir uschia custia dapli che la producziun convenziunala cun chemia e las pajas bassas a l'ester. Il model da Rotauf n’è betg dad esser ina firma da moda mabain ina firma che producescha vestgadira per ir cun skis u ir a culm.