Nus essan la carta da visita dal papa.
Uschia ha descrit il gardist Martin Muoth l’onn 1999 ses servetsch tar la Guardia Svizra Papala in'occasiun da sia saramentaziun a Roma. La Televisiun Rumantscha aveva accumpagnà el da quellas uras.
En la Vita e cretta lascha el dar in u l'auter cuc davos las culissas da la Guardia Svizra, per exempel dad exercizis da sajettar cun il schluppet d'assagl a la riva da la Mar Mediterrana u da fimar spert ina cun il numer dus dal Vatican.
Martin Muoth è er oz anc incumbensà da segirezza. Uss è el responsabel per la segirezza en la praschun da Cazas Tignez.
La saramentaziun dals gardists novs è onn per onn la pli gronda festa per la Guardia Svizra. Quest onn pon er ils anteriurs gardists far anc ina giada ina festa.
100 onns Uniun d’anteriurs Gardists Papals Svizzers
Ensemen cun lur famiglias èn tut ils gardists anteriurs envidads questa fin d'emna ad ina gronda festa d'anniversari: L'Uniun d’anteriurs Gardists Papals Svizzers ha 100 onns. La dieta da giubileum vegn festivada cun in grond program da festa, cun cortegi e banchet e natiralmain cun ina messa festiva en la baselgia St.Mauritius ad Appenzell.
Per festivar quest anniversari da la Guardia Svizra han ils organisaturs dal giubileum gì in'idea speziala – ed inizià la cumposisziun dad ina chanzun aposta per la Guardia Svizra.
«Gardelied» – la melodia per il 100avel anniversari
La chanzun «Gardelied» è in regal d’anniversari per il 100avel da l’Uniun d’anteriurs Gardists Papals Svizzers. Per realisar quel regal han ils responsabels da l’uniun incumbensà in dals lurs. Da far quai saja ina grond’onur, ha ditg l’anteriur gardist Flavio Bundi, oz capo redactur da RTR.
Per l’anniversari ha el cumponì in imni en quatter strofas ed en tut las quatter linguas svizras. «Acriter et fideliter», il motto da la Guardia Svizra, è ina part centrala da la chanzun. In occasiun da la messa festiva dals 26 da zercladur 2022 ad Appenzell è la primaudiziun.
O vaillant saint Sébastian, héraut de vérité.
Donne nous ta force et ton courage, ton humilité !
Donne nous ta force et ton courage, ton humilité !
O Bruder Klaus, du Schutzpatron, zeig uns den Weg, das Ziel.
Schenk deinen Rat und deinen Mut. Schenk uns deine Kraft!
Schenk deinen Rat und deinen Mut. Schenk uns deine Kraft!
Embratscha nus, o Sogn Martin, cun ti’ humilitad!
Regala nus la cumpassiun et tia buontad !
Regala nus la cumpassiun et tia buontad !
Uniti nella fede, preghiamo con fervor’.
Serviamo’il Papa e la chiesa con grande’amor’!
Serviamo’il Papa e la chiesa con grande’amor’!
Acriter fideliter!
Acriter fideliter!
Text e musica: Flavio Bundi
Per chargiar giu:
Sche Vus vulais udir questa primaudiziun u insumma dar in cuc en la messa festiva, pudais Vus far quai en il curs dals proxims dis tar Youtube. Là è la baselgia St. Mauritius Appenzell preschenta en la rait.
