Vita e cretta - Invista en l'urden da chavaliers da la Sontga Fossa da Jerusalem

Ils onns 2000 sa chattava il thriller «Sakrileg – The Da Vinci Code» prubabel sin inqual maisetta da notg. Il roman fictiv da l'autur american Dan Brown ch'è pli tard er vegnì en ils kinos cun Tom Hanks ed Audrey Tautou en las rollas principalas, tracta ina conspiraziun da la baselgia catolica en connex cun Jesus ed il Sontg Graal.

I va per rituals, templier, religiun, misteris. E sch’ins auda per l’emprima giada dal «urden da chavaliers da la Sontga Fossa da Jerusalem» pudess er vegnir endament sco emprim in tal maletg. En realitad èsi dentant tut auter, raquinta Aaron Bellini ch'è sez chavalier e part da quest urden. I na dettia nagins secrets u misteris. L'urden saja avert e directamain suttamess al papa.

Las trais finamiras principalas da l’urden

1. Sustegn dals cristians e cristianas en la Terra Sontga: Quai capita surtut cun agid finanzial per scolas, ospitals u endrizzaments per persunas cun impediments. Quels lieus sajan dentant averts per persunas da tuttas religiuns. «Uschia promovain nus la convivenza tranter religiuns», di Aaron Bellini. Politicamain restia l’urden neutral, er sche guerra saja adina insatge trist, na commenteschian ins betg guerras u fatgs politics.
2. Vita spirituala: Ils commembers e las commembras aspiran ina vita cristiana exemplarica, s’engaschan per lur cretta ed emprovan da vegnir adina pli manaivel a Dieu. Tar quai tutga er l’uraziun per tut las cartentas e ils betg cartents.
3. Convivenza: L’urden promova er la convivenza ed il sustegn vicendaivel tranter ses commembers e commembras. Tar quai tutgan visitas tar commembers e commembras pli veglias, inscunters communabels ed activitads culturalas.

Daventar commember u commembras, resp. chavalier u dama, na saja betg uschè simpel, di Aaron Bellini. Pretendì vegnia tranter auter ch'ins è battegià e ch'ins haja la communiun e la cresma. Sch'ins è maridà, ston ins esser maridà en baselgia. Agens uffants ston esser battegiads.

Las persunas che vulessan daventar chavalier u dama ston viver ina vita catolica activa, i dovra persunas da referenza e l’approvaziun da l’uvestg. Ils documents da la candidata u dal candidat vegnan lura examinads a Roma. Sch’ins vegn acceptà, suonda l’investitura – ina ceremonia da trais dis cun uraziuns, empermischun ed il «metter si il mantel» simbolic.

Per ils umens in mantel alv cun si la crusch da Jerusalem cotschna e per las dunnas in mantel nair cun la crusch. Il mantel simbolisescha il pelegrinadi tras la vita cristiana, explitgescha Aaron Bellini. Enstagl da l'accolada (Ritterschlag) cun ina spada succeda quella ozendi cun ina crusch.

Quest onn ha l’investitura lieu la fin da matg a Cuira. Spetgadas vegnan persunas da l’entir mund. E malgrà la reputaziun exclusiva dals chavaliers e da las damas accentuescha Aaron Bellini la modestadad: «Nus essan simplamain carstgauns sco tut ils auters.»

Podcast Vita e cretta

L’ura da religiun è ina oasa da tempra religius-meditativa cun novitads or dal mund da las religiuns, predi/meditaziun e dapli.

Ulteriurs audios e podcasts