Cura ch’el lavuria en projects da construcziun vid edifizis sacrals sa movia el adina en in champ da tensiuns tranter dumondas da protecziun da monuments, pretensiuns liturgicas ed aspects estetics. Quai explitgescha l’architect Gion Signorell da Domat, ch’aveva realisà la restauraziun cumplexa da la catedrala da Cuira.
En tals projects cun tantas persunas involvidas è ina buna communicaziun insatge dal pli impurtant – l'uman stat en il center dal process.
Ils pli blers projects da construcziun da Gion Signorell èn projects senza in connex sacral – gugent lavura el dentant era en il conturn ecclesiastic, sco per exempel actualmain cun la restauraziun da la baselgia Sogn Gion a Domat.
Damai ch'i na vegnan actualmain construidas quasi naginas novas baselgias, sa tracta quai uschiglio il pli savens da lavurs da conservaziun u da restauraziun. Per quellas lavurs pretensiusas na sto l’architect betg mo enconuscher la biografia da l’edifizi, mabain era sa fatschentar intensivamain cun dumondas liturgicas.
Jau na vegn betg adina d'accord cun las pretensiuns da la baselgia, quai ha era gia chaschunà bleras discussiuns. Ma cun Joseph Bonnemain èn quellas adina stadas fitg interessantas.
Quant spazi ha qua anc la creativitad? E – cun la baselgia sco incumbensadra – tge discussiuns chaschuna in tal project? Da talas discussiuns, da collavuraziun fritgaivla e da l’act equilibristic tranter conservar e restaurar en projects da construcziun sacrala raquinta Gion Signorell en Vita e cretta.