Tut quai respunda l’emissiun speziala da Nadal da Vita e cretta. Atmosfera da Nadal na derasain nus betg mo durant in’ura d’emissiun, nus festivain Nadal durant dus uras.
Per exempel giain nus cun Vus a l’exposiziun tradiziunala en il Museum naziunal svizzer a Turitg che sa deditgescha mintgamai a las stallas da Nadal. Quai vul dir – nus sfundrain en in mund fascinant d'artisanadi vegl, da stallas da differents stils e materials, figuras anticas custaivlas, tailas splendurantas e da tuttas colurs.
Ultra da quai raquintain nus in’istorgia da Nadal che va a prà bain cun il temp actual, pigliain en mira ina veglia tradiziun da Nadal a Lavin che reunescha e collia ils abitants dal vitg engiadinais. E... nus giain a la tschertga da fastiz en connex cun l'istorgia da Nadal cun dus scienziads.
Era la naschientscha da Jesus ils 24 da december avant 2020 onns, sco nossa cronologia di? E co era quai cun Maria e Josef, che n’han betg survegnì suttetg a Bethlehem? Ed eri propi enviern?
Tut quai èn vardads da Nadal, ch’appartegnan tar nossa cultura. Co statti dentant istoricamain cun tut questas vardads? Precis quai han perscrutà dus scienziads teologics, il professer Simone Paganini dad Aachen e sia dunna Claudia, assistenta a l’institut per filosofia cristiana ad Innsbruck. Quest atun han els publitgà lur retschertgas: «Von wegen Heilige Nacht – Der grosse Faktencheck zur Weihnachtsgeschichte» ha num lur cudesch. L’emprima ediziun è gia quasi exausta.
Lur retschertgas èn fundadas e lur stil da servir ellas è propi divertaivel. Ed anc insatge: Malgrà tut la profanaziun, che la perscrutaziun scientifica sa signifitgar resta ina cler er per els dus – la magia da l’istorgia da Nadal.