Questa said da vendetga da Jesus pudeva chaschunar morts, pervia da sia forza surnatirala. Diversas anecdotas or da l'Evangeli da l'uffanza da Tomas, in evangeli apocrif, demussan quai. En ina lascha Jesus pirir in buob ch'aveva vilentà el cun far termagls. In auter mat ch'aveva stuschà el vi da la spatla, lascha Jesus dar enturn mort. Anecdotas che fan surstar e che van insumma betg a prà cun il maletg da Jesus transmess en nossa cultura.
Quel maletg da Jesus po sa chapescha esser in affrunt, ina provocaziun. Normalmain ins enconuscha Jesus che dovra sias forzas surnatiralas mo per far dal bun. E qua vegn quai ironisà. Quai è dentant fitg interessant ed era bel.
L’Evangeli da l’uffanza da Tomas è ina scrittira fitg veglia, na fa però betg part da la Bibla uffiziala. Ella ha dentant inspirà l'artist che ha creà il palantschieu sura da lain renumà da la baselgia Sogn Martegn a Ziràn. Quest artist nunenconuschent ha malegià l'episoda, cura che Jesus fa termagls cun dus cumpogns e furma paslers or d'arschiglia. Vita e Cretta raquinta dapli da quest'istorgia e mussa in maletg da Jesus ch’ins n’ha anc strusch vesì ina giada.