Jau crai perquai ch’jau sun persvadì ch’i dat insatge transcendent che nus numnain Dieu.
Quai di Mariano Tschuor ch’è creschì si en Surselva. Blers onns ha el lavurà tar SRF e RTR sco schurnalist, producent, moderatur, schefredactur ed er sco directur da RTR. Uss è el president da la cumissiun da medias da la Conferenza dals uvestgs Svizzers.
Benedì è el vegnì en tut quels muments entaifer la famiglia, da nozzas, battens u craismas - en relaziuns cun carstgauns ch’han dà perditga da lur cardientscha cun viver la charezza proximala. Benedì dentant er fitg savens, cura ch’el è persul en la meditaziun.
En l’oraziun hai jau l’impressiun da vegnir fitg datiers a quella amicizia cun Jesus.
Mariano Tschuor
-
Bild 1 von 3. Lavur sin la maschina da scriver. Mariano Tschuor sco um giuven. Bildquelle: RTR / Claudia Cathomen.
-
Bild 2 von 3. Correspundent dad SRF. Mariano Tschuor ha lavurà sco correspundet dal Grischun per SRF. Bildquelle: RTR / Claudia Cathomen.
-
Bild 3 von 3. Mariano Tschuor tegn in referat. Mariano Tschuor tegn in referat a la Scola auta da teologia a Cuira. Bildquelle: RTR / Claudia Cathomen.
Blessà è el vegnì plitost, cura che l’instituziun baselgia ha prendì il pled, ha decretà, denunzià, exclus ina part da la carstgaunadad. Persunalmain ha Mariano Tschuor sentì quai sco schurnalist, sco correspundent da SRF a Cuira, nua ch’igl ha dà muments en connex cun l’uvestg Haas, ch’el na vuless betg pli ch’els vegnissan repetids.
Quai è savens stà malempernaivel ed jau sun vegnì blessà – betg corporalmain, ma emoziunalmain e nà da l’olma.