Mintgatant passentain nus il temp en baselgias, bleras giadas passain nus sperasvi. Savens essan nus dentant gnanc propi pertscherts, quant gronda che la valita culturala da quels edifizis sacrals è. E quantas baselgias extraordinarias da tala valur culturala che stattan sin il territori grischun.
I n’è betg mo la quantitad, mabain era la qualitad ch’è decisiva tar ils edifizis sacrals en il Grischun. Qua existan fitg bleras baselgias fitg veglias ch’èn mantegnidas en la substanza oriunda.
Vita e cretta profita da la chaschun da metter en il center quest patrimoni cultural impurtant, ils edifizis sacrals dal Grischun. Quai faschain nus cun Markus Anker. El è spiritual evangelic a l’Universitad da Son Gagl ed in enconuschider cumpetent dal bain ecclesiastic e l’architectura sacrala en il noss chantun.
Numerusas baselgias stattan en in lieu solitari, davent da la vischnanca. Lur integraziun en la cuntrada è savens anc originala. Quai è era caracteristic per bleras baselgias en il Grischun.
Pertge èn baselgias edifizis multifuncziunals? Tge differenza datti en quest connex tranter baselgias en la citad e sin la champagna? E pertge èn las baselgias sin il territori grischun insumma da muntada particulara?
