Siglir tar il cuntegn

Header

audio
«Nus na savain betg mazzar ina mustga – e quai cun buna raschun»
Or da Vita e cretta dals 05.12.2021.
laschar ir. Durada: 59 minutas 57 Secundas.
cuntegn

Vita e cretta «Nus na savain betg mazzar ina mustga – e quai cun buna raschun»

Plirs studis da l’Uffizi federal da migraziun (UFM) han mussà che blers Svizzers e bleras Svizras èn da l’avis, che la gruppa d’immigraziun tamila saja zunt discreta, diligenta e simpatica. Era saja la glieud tamila integrada fitg bain.

Per obtegnair questa buna reputaziun han Tamils e Tamilas dentant stuì sa cumprovar: L’entschatta dals onns otganta, cura ch’i ha dà ina gronda unda da migraziun causa da la guerra civila en Sri Lanka, èn ins savens stà irrità en connex cun ils Tamils e las Tamilas en Svizra. Quai pervi da la colur da lur pel stgira.

Ina chaussa che disturba anc oz ils Svizzers è l’odur sche nus avain cuschinà. Ma quai crititgeschan els mo enfin ch’i vegnan a mangiar ina giada tar nus.
Autur: Sivalingam Thangarajah commember da l'Uniun tamil-hinduistica grischuna

L'ultima dumbraziun dal pievel federala ha mussà ch’i dat in grond dumber da Tamils e Tamilas en Svizra ch’appartegnan al hinduissem. En il Grischun datti varga 200 famiglias hinduisticas. La pli gronda part dad ellas fa part da l’Uniun tamil-hinduistica grischuna. Dapi 36 onns fa era Sivalingam Thangarajah da Malans part da quella. La cuminanza religiusa saja in grond agid en chaussas integraziun. Dentant era il Post spezialisà per l’integraziun dal Grischun fetschia fitg buna lavur en favur da migrantas e migrants, constatescha Sivalingam Thangarajah.

Nus essan fitg engraziaivels che nus pudain viver en Svizra senza avair tema.
Autur: Sivalingam Thangarajah commember da l'Uniun tamil-hinduistica grischuna

Tge ch’è tenor el il misteri da l'integraziun gartegiada dal pievel tamil en Svizra, sco ch’el e ses convischins e sias convischinas vivan lur religiun en il noss chantun e sco ch'era persunas svizras sa participeschan activamain a lur mintgadi influenzà da la religiun, quai raquinta Sivalingam Thangarajah en Vita e cretta.

Il hinduissem

Avrir la box Serrar la box
Sepultura da Hindus en la Reuss
Legenda: Sepultura da Hindus en la Reuss MAD

Il hinduissem è suenter il cristianissem e l'islam la terz gronda religiun dal mund. Ils hindus crain vid la reincarnaziun, pia che la vita e la mort èn part d'in ciclus infinit.

Lur Dieus
Ils trais pli impurtants Dieus dals hindus èn Brahman, Vishnu e Shiva. Brahma stat per la creaziun e vala sco quel ch’ha creà l’univers. Vishnu: Quest Dieu vegn da temp en temp sin terra sco uman u sco animal per impedir sventira. Shiva vegn numnà “il destruider”; el destruescha tut il vegl per ch’i possia dar insatge nov sin quest mund.


Lur tempel
Ils hindus sa radunan en il tempel. Per il hinduissem represchenta il tempel il cosmos. Là s’inscuntran il mund dals Dieus ed il mund dals umans.

Lur Sontga scrittira
La pli veglia collecziun da scrittiras dal hinduissem è la Veda. Questas cuntegnan istorgias davart ils Dieus, scungiraments e chanzuns che vegnivan chantadas pli baud da spirituals. Las Veda èn vegnidas scrittas avant circa 3000 onns.
Las pli impurtantas scrittiras dal hinduissem èn ozendi las Upanishadas. Il pled munta “sesa al pe da tes scolast”. En questas scrittiras filosoficas vegn declerà il curs da la vita e da la mort.
La Bhagavad Gita è la pli enconuschenta scrittira dals hindus. Questa scrittira han oravant tut ils uffants gugent. La scrittira cuntegna istorgias da l’erox Arjuna e ses inscunters cun il Dieu Krischna.

audio
«Nus na savain betg mazzar ina mustga – e quai cun buna raschun» - part 1
ord Vita e cretta dals 05.12.2021.
laschar ir. Durada: 4 minutas 51 Secundas.
audio
«Nus na savain betg mazzar ina mustga – e quai cun buna raschun» - part 2
ord Vita e cretta dals 05.12.2021.
laschar ir. Durada: 7 minutas 2 Secundas.

Vita e cretta 08:00

Artitgels legids il pli savens

Scrollar a sanestra Scrollar a dretga