Numerusas plaivs catolicas e refurmadas en Svizra discuteschan bain il tema fusiunar. Ils davos onns han bleras plaivs er gia realisà fusiuns, tranter auter en il Grischun. Las plaivs tiran a niz las sinergias che sa porschan uschia. Dentant vegni adina fusiunà entaifer ina confessiun, plaivs catolicas fusiuneschan cun autras plaivs catolicas e refurmadas cun autras refurmadas.
Ina fusiun da la Baselgia catolica e la Baselgia refurmada na poss jau betg m’imaginar. Quai ha las pli differentas raschuns, tranter auter raschuns istoricas. Tenor mes avis fissi pli adequat da collavurar nua ch’igl è pussaivel ed era dad esser pli curaschus en quel grà en l’avegnir.
Na fissi dentant betg cunvegnent da trair en consideraziun pass pli radicals en vista a la situaziun actuala da las baselgias? Per far frunt a problems sco la digren cuntinuada da commembras e commembers duvrassi forsa mesiras sco ina fusiun a moda surconfessiunala, ina fusiun da la Baselgia catolica cun la Baselgia refurmada.
La dumonda d’ina tala fusiun sfida il pensar. Forsa stuess ins propi considerar da discutar insumma questa pussaivladad. En mintga cas fiss ina fusiun in grond pass ed era in vaira lung process. Ed i duvrass glieud che fiss pronta da s’inscuntrar e da discutar sin il medem nivel.
Reunir insatge che tutgava ditg ensemen fin a la refurmaziun en il 16avel tschientaner, e quai a favur d’ina ferma instituziun futura. Pertge na vegn questa pussaivladad betg discutada pli savens en in rom public? Per tge motivs ins sclauda la dumonda d’ina tala fusiun e sut tge cundiziuns pudess ella tuttina vegnir realisada?
Quellas dumondas discutescha Vita e cretta cun il pedagog e teolog catolic Marcel Köhle, ch’è commember da la Baselgia catolica, e cun reverenda Marianne Strub dad Ardez, che represchenta la vista da la Baselgia refurmada.