In rapport da l’uffizi da migraziun e da dretg civil e da la Baselgia evangelica refurmada dal Grischun da l’onn 2017 ha mussà che la diversitad da religiuns en il noss chantun è zunt vasta. Sper las baselgias tradiziunalas, la Baselgia roman-catolica e la Baselgia evangelica refurmada, datti era numerusas autras cuminanzas da minoritads religiusas. Per exempel ina baselgia eritrean-ortodoxa, ina asiatic-islamica, ina vietnamais-budistica ubain era diversas baselgias independentas sco la focusC.
Jau mez n'aveva era betg fatg quint ch'i dettia ina tala varietad da religiuns en il Grischun. Il rapport ha mussà che era cuminanzas religiusas sco l'eritrean-catolica ubain la evangelica refurmada tamila èn da chasa tar nus.
Oravant tut per migrants e migrantas èn lur cuminanzas religiusas in lieu fitg impurtant – quasi in refugi. Là na pon ils umans che derivan da pajais esters betg mo pratitgar e viver lur atgna religiun, els pon era s’inscuntrar, s’infurmar e chattar agid.
Entant che las cuminanzas religiusas tradiziunalas perdan pli e pli lur muntada, èn las cuminanzas da migraziun religiusas indispensablas per lur commembers e commembras.
Vita e cretta dat in sguard sin la lavur d’integraziun da las cuminanzas da migraziun religiusas dal Grischun, guarda tge ch’ellas porschan a lur commembers e commembras e cun tge sfidas ch’ellas èn confruntadas.
La diversitad religiusa en il Grischun
